Guwahati, Nailar 12: U Myntri Rangbah ka jylla Assam u Himanta Biswa Sarma ha ka sngi Balang u la kyntu ïa ka sorkar Arunachal Pradesh ba kan bthah ban pynlong ïa ka jingtohkit halor ka jingïakynad ha khappud Assam bad Arunachal kaba dang shen, ban ithuh ïa kiba donkti bad ban shim ïa ka “jingshim khia kaba tyngeh”.
U la ban jur ruh ba ym dei ban ailad ïa kane ka jingjia ba kan pynsniew ïa ka jingïadei kaba la slem bha hapdeng kine ki ar tylli ki jylla.
U Sarma u la ong ba ki jaidbynriew kiba don bynta ha ka jingiakhun kaba dang shen, kata ka Mising jong ka Assam bad Adi jong ka Arunachal Pradesh, ki don ka jingiadei kaba jylliew ha ka histori bad ka kolshor.
“Kine ki dei arngut shipara.Kam lah ban don ka jingiakynad kaba neh hapdeng kine ki ar jaitbynriew”, la ong u Sarma bad bynrap ba u ngeit ba ka jinglong jingman kaba mynta ka dei ka jingkynran dien kaba shipor.
Da kaba ong ba un kyntu ia uMyntri Rangbah ka Arunachal Pradesh, u Pema Khandu ba un pyntikna ban shim khia ban tohkit bad kito ki briew kiba donkti kidei ban ngat ha ka jingshah pynshitom.
“Lada ka la don ka kam runar, hap ban don ka jingtohkit, hap ban lap ia ki nongleh kam sniew bad hap ban leh da kaba tyngeh”, la ong u Sarma.
Kane ka jingkren ka la wan shisngi hadien ka jingshah siat ha shilynter ka khappud Assam-Arunachal ha madan Lower Siang kaba la pynlong ïa 11 ngut ki briew ban mynsaw, ong ka khubor.Baroh ar tylli ki bor pyniaid ka jylla ki la pyrshang ban teh lakam ia ka jinglong jingman.
U Sarma u la ong ruh ba u Myntri ka Assam u Ranoj Pegu bad u Khandu ki la ïakren ha ka sngi Balang ban trei ban weng ïa ka jingeh.U la pynpaw ka jingshaniah ba yn lah ban tehlakam ia ka jinglong jingman bad ba ka jingkhanglad ha ka ioh ka kot kaba la pynmih da katei ka jingjia ruh kan kham suk.
“Kam don kano kano ka jingkylli ban don ka jingïakynad kaba neh hapdeng ka Assam bad ka Arunachal Pradesh,” ong u Sarma da kaba pynksan ba kine ki ar tylli ki jylla ki don ïa ka jingïatreilang bad ka jingïadei ha ka imlang sahlang kaba slem bha.
