Shillong, Nailur 13: Ka Sorkar Jylla kala kyrpad ia ka Sorkar Pdeng ba kan pynbteng shuwa ha ka jingpyntreikam ia ka skhim Border Area Development Programme (BADP) ha Jylla Meghalaya.
Ia kane la pyntip da u Myntri ba khmih ia ka Tnad Border Area Development ma Lahkmen Rymbui haba jubab ia ka Zero Hour Notice bala wanrah da u MLA ka Mawsynram Bah Himalaya Shangpliang hynne ka sngi ba-ar ha Iingdorbar Thaw Ain.
U ma Lahkmen ula iathuh ba ka Tnad lyngba ka shithi ba 2 tarik Nailar, 2022, kala iakren ia kane ka kam bad ka Ministry of Home Affairs (MHA) ban pynbteng shuwa ia ka BADP na ka bynta ka jingmyntoi jong ki paidbah kiba shong shnong ha ki jaka khappud.
Ka MHA lyngba ka shithi bala ai ha ka 6 tarik Iaiong 2022, kala bthah ba ia ka BADP lah ban pynbteng tang haduh ka 30 tarik Nailur bad ba ym dei shuh ban phah ia ka Annual Action Plan jong u snem 2022-2023 sha ka Ministry.
Lyngba kane ka shithi, ka MHA kala bthah ruh ba ym dei ruh ban mynjur ia ki kam thymmai hapoh ka BADP bad kyrpad ia ki Sorkar Jylla ba kin buhkhmat ia ki kam ba kham kongsan. Tang ki kam bala iaid ki dei ban bteng. Ia kikam ki bym pat iaid ym dei shuh ban pyntrei, ula ong.
U Myntri ula pyntip ruh ba ka Tnad kala ioh pdiang ia ka email na ka Ministry ba kyrpad ban ai jingkhein ia ka jingdon jong ka pisa bala mang ia ki kam ba dang iaid hapoh ka BADP Online Management System (OMS). Baroh ki jingtip bad ki jingbthah bala pan da ka Ministry la dep ban thep ha ka OMS jong ka BADP na ka bynta ki project ba dang iaid jong u snem 2020-2021.
U ma Lahkmen ula ong ba halor kane, ka Sorkar Jylla kala pyntrei mynta ia 99 tylli ki project kiba la mynjur jong u snem 2020-2021.
Shuwa kane, u Bah Himalaya ula pynpaw ia ka jingsngewkhia halor ka jingbym pyllait ia ka song pisa jong ka BADP ha kine ki arsnem bala leit noh. U pyntip ba ula phah ia ki skhim ba kot T. 2.12 klur jong u snem 2021-2022 bad T. 2.28 klur jong u snem 2022-2023 na ka bynta ki jaka kiba hap hapoh ka Mawsynram Block bad ia kine ki skhim la dep mynjur ruh da ka State Level Screening Committee.
Kat kum ka jingong jong u, ka jingbym pyllait ia ka song pisa kala ktah jur ia ki kam pynroi ha ki shnong khappud.
Ha kajuh ka por u Myntri u pyntip ba jong u snem 2021-2022, ka MHA, Department of Border Management lyngba ka shithi ba 3 tarik Lber 2022, kala pyllait ia ka song pisa ba T. 665 lak (T.585 lak ka bhah Sorkar Pdeng bad T. 65 lak ka bhah ka Jylla) kum ka bynta ba nyngkong.
U pyntip ba ka Tnad kala ioh pdiang ia kane ka song pisa bad ia kane ka pisa la pyndonkam ha kaba pyntreikam ia ki 99 tylli ki project napdeng ki 139 tylli ki project bala mynjur jong u snem 2020-2021 bad 100% ka UC la dep ban phah sha ka Ministry ha u bnai Nailar 2022 jong kane ka song pisa.
U Myntri u ong ba ka song ba dang sah ban pyndep ia kine ki project ba dang iaid mynta kumba la khein da ka Sorkar Jylla ka kot T. 741.83 lak kaba dei ka bhah na ka MHA kaba khlem pat pyllait satia namar ki katto katne ki jingeh ba iadei bad ka PFMS.
“Nalor kata, 169 tylli ki project ba T. 2229.10 lak kat kum ka jingai bhah ka MHA jong u snem 2021-2022 ki dei kiba la dep ai jingmynjur da ka State Level Screening Committee bad ia kane la dep phah ruh sha ka Ministry, hynrei ngim pat ioh satia ia ka pisa haduh mynta” ong u Myntri.
U Myntri u pyntip ba ha u snem 2019-2020, ka Sorkar kala pyllait ia ka song pisa ba T. 5066.883 lak (T.4536.42 lak ka bhah na Sorkar Pdeng bad T. 530.463 lak naka Jylla) ban pyntreikam ia ka BADP ha Jylla bad la dep ruh ban aiti ia 100% ka UC sha ka Ministry ha u Nohprah 2021.
Nalor kata, 14 tylli ki project ba T. 375.9795 lak kiba la dep ban mynjur da ka MHA jong u snem 2019-2020 la dep ban pyllait ia ka pisa ha u 2021-2022 na ka pla tyngka ka Jylla bad ia kane ka pisa la dep ban pyndonkam lut kat kum kaba la mang ia ka.
U pyntip ba ha u snem 2020-2021,ka MHA kala mynjur haduh 139 tylli ki project ba kot T. 15.66 klur hynrei kam pat shym la pyllait satia ia ka song pisa ha une u snem mang tyngka ba mynta.
U pyntip ba ia kane ka kam la dep ruh ban iakren lyngba ka phone bad ka MHA bad ka daw ba ka ai ka long namar ka jingwan lynshop ka khlam Covid-19.
