Nongpoh, Nailur 13: Ka Confederation of Ri-Bhoi People (CORP) kala dawa ia ka Sorkar Jylla ba kan tuklar bad leh eiei noh halor ka jingtrei torti jong ka kompani Jio, kaba tih khyndew khyndew ban thep ïa ki wire fiber ha ka shnong Myrdon Mawtari kaba la wanrah ïa ka jingtwa jong u surok bad buh jingeh ïa ka leit ka wan jong u paidbah ka thaiñ.
Kane ka Seng kala ther tyngeh ruh ia u Deputy Commissioner ka Ri-Bhoi uba la leh mynthi ban khot ia ka seng ban iakren halor ki jingeh ba mad da ki paidbah ka District haba ong ba kane ka jingleh une u khlieh ka District ka pyni ia ka jingbym khein snep ia ki kynhun Sengbhalang.
Kane ka jingkynthoh kala mih hadien ba u Deputy Commissioner ula kyntait ban iakynduh ia ki Nongialam ka CORP kaba la mudui ia ka jingkynnoh tih khyndew torti ka kompani Jio ha Myrdon Mawtari kaba la ktah ia ka leit ka wan ki paidbah.
Ki Nongialam ka CORP bala ialam da u President samla Shiningstar Kyntla, kila leit iakynduh ban iakynduh ia u DC hynne ka sngi hynrei namar ka jingbym treh jong u, kila iakynduh noh ia i Additional Deputy Commissioner Kong Balakyntiew Rani bad aiti ia ka shithi ujor ba dawa ia ka bor district ban hukum ia ka kompani Jio ba kan maramot ia ka surok ba twa ha Myrdon Mawtari kaba pyniasoh ia saw tylli ki Shnong.
Une u Nongialam u pyntip ba ka CORP kala dawa maramot ia kane ka surok la shibnai tam na ka kompani Jio hynrei kane ka kompani kala leh bym suidniew. Namar kata, ka seng kala leit ujor sha ki bor District ba kan tuklar bad shimkhia mardor.
Ha kajuh ka por, kane ka Seng kala byrngem ba lada kane ka jingdawa maramot ia ka surok kam seisoh satia, ka seng kan sa shim da ki lad ba tyngeh halor ka rukom trei torti jong ka kompani Jio.
