Nongpoh, Lber 13: Kawei ka trok kaba kit ia ki tyndong lyer ka la kem ding kynsan katba ka dang kiew na Guwahati sha Shillong.
Kane ka jingjia ka la jia ha ka step phyrngap sngi Thohdieng por 12:55 eiei, ha ka thain Pahammawlein hajan ka khyrdop khrong khajna jong ka NHAI kaba don ha National Highwau-06.
Katkum ka khubor Pulit, la ong ba kane ka trok AS 01 SC 1518 ka la kem ding kynsan na ki bynta ba shakhmat tad haduh ba ka ding kaba klang bha, ka la bam duh ia ki bynta ba shakhmat.
La iathuh ruh, ba tang mar ia sdang kem ding u nongñiah jong katei ka trok u la mareh ban pan jingiarap na ki nongtrei ka NHAI kiba la pyntip sha ki pulit ka Byrnihat Police Station bad pulit ka Fire and Emergency Services kiba la poi kloi sha katei ka jaka ban ioh tem noh ia ka ding hashwa ban pur sha ki bynta ba la buh ia ki tyndong lyer bad iada na ka jingpluh kaba shyrkhei.
Na ka liang ki bor pulit ki dang pynlong ia ka jingtohkit halor katei ka jingjia bad la antad ka jingkem ding ka lah ban dei namar ka jingthut ha ki wire bording lane short circuit.
