Nongstoiñ, Naiwieng 16: Namar ka jingthut khah khah jong ka bording elektrik ha West Khasi Hills, ka ophis jong ka Meghalaya Energy Power Distribution Corporation Limited (MePDCL), ka kyrpad jur їa ki paitbah nongpyndonkam bording hapoh ka District, ba kin їaishah shipor bad ka jingthut jong ka bording hapoh ka District.
Kane ka Ophis kala pynshai ba ka jingthut khah khah jong ka bording, ka dei namar ba katba nang mih ki sngi ki nongpyndon kam bording ki nang bun bad namar ba ki mashin bad ki kor pynmih bording ki barim ki dei kiba rit kim lah kit shuh, kumta ka ophis ka hap ban bujli da kiba thymmai bad kiba kham heh.
Ha ka por ba ki bujli їa kitei ki mashin ki hap ban pynlip shuwa їa ka bording namar lada ym pynlip kabuh їa ki nongtrei ha ka jingma.
Nalor kane, kala pyntip ruh b aka don ka jing maramot bad pynbha їa ki 33/bad 11 Kv line kum ha Nongstoiñ, Nongpyndeng, Nongkasen, Riangdo, Rambrai, Shahlang bad kiwei kiwei ki jaka, kumta ka Ophis ka hap ban pynlip ia ka bordongha ka por ba maramot bad pynbha їa kitei ki line.
Ka ophis ka pynshai ruh sha ki paitbah ba ka jingthut ka bording, ka dei ruh namar ka jingpyntrei ban pynheh їa ki surok ha kaba ki don ki jaka ba ka surok ka їaid na pdeng jong ka laiñ ba ki sainar eletrik ki kham tbian, ka don ka jingma haba ki puh shilum ki tih їa ka surok ioh lehse kumno re kumno ki kum tyngkhuh ha ki sainar lane ka jingkhyllem jong ki post elektrik, kaba lah ban wanrah їa ka jingmynsaw ym tang їa ki ba trei surok hynrei їa kiba їaid ba їeng ruh.
Ki bor pynїaid ka ophis ki la pynshai ruh ba ka jing duh bording ka don ruh ha ka por ba ki don ki tnad dieng kiba hap bad tyngkhuh bad ki fuse ki ing bad dkut noh. Lane ka don ka jingpei jong ki waїar jri kiba heh ha ki jaka buh mashin, hynrei haba don kiba kum kitei, ka ophis ka їaleh katba lah ban moramot ha ka por kaba biang.
