Shillong, Naiwieng 16: Ha ki 4 snem tam, nga lah trei shibun naka bynta ki paidbah nong shong shnong ka Mawhati bad mynta ngan trei sa naka bynta ki paidbah nong shong shnong ka Nongkrem konstitwensi.
Ia kane la ong da u myntri ka tnat PWD (Building) u bah Dasakhiat Lamare u badei ruh u MLA ka Mawhati konstitwensi u ban iakhun iaka ilekshon 2023 na Nongkrem konstitwensi.
Haba kren sha ki lad pathai khubor u bah Dasakhiat u la ong ba naduh 2018 u la kwah ban iakhun ilekshon na Nongkrem konstitwensi hynrei hadien ka jingiapynbeit hapoh ïng u la iakhun noh na Mawhati konstitwensi hynrei ha ka ilekshon 2023 la dep ban ia pynbeit ban iakhun hi na Nongkrem.
U bah Dasakhiat u la ong ba haba peit ha ki rynsan ‘Social Media’ ki la mih shibun ki jingkynthoh ba u (Dasakhiat) u la mih na Mawhati ban iakhun noh na Nongkrem namar u sheptieng ioh u rem noh haka ilekshon 2023 hynrei kine kiba kynthoh kidei ki briew na bar ka Mawhati bad kim tip kaei kaba u la leh naka bynta ki paidbah ka Mawhati konstitwensi ha kine ki snem ba u dang dei u MLA.
“Ha kine ki 4 snem tam ba nga dang dei hi u MLA ka Mawhati, nga la pynioh palat T.400 klur tam ki skhim pynroi iaki paidbah nong shong shnong ka Mawhati bad ka konstitwensi khamtam haba iadei bad ki surok lem bad kiwei ki lad jingiarap kum ki tin sop ïng bad kiwei kiwei de” la ong u bah Daskhiat.
U bah Dasakhiat u la iathuh ba dang shen u la plie iaka surok na Umsning sha Jagi Road kaba la shna haka jinglut kumba T.114 klur bad shen yn sa plie ruh iaka surok Liarbang sha Mawlasnai kaba la mang haduh T. 18.50 klur bad ka surok na Khyndewsow sha Thadrang kaba la mang haduh T. 20 klur.
U la ong ba kito kiba artatien bad kiba bein ba u khlem leh eiei naka bynta ka Mawhati kidei ki briew ba na bar ka konstitwensi bad lada ki kwah shisha ban tip kaei u MLA ka thain u la leh naka bynta ki paidbah, kidei ban leit kylli na ki paidbah nong shong shnong ka konstitwensi.
