Langpih, Naiwieng 16: Ka Langpih Anchlak Gorkha Student Union kala pynpaw ba ka jingiakynad pher jaidbynriew hapdeng ki Nepali bad ki Khasi ha ka thain Langpih, kala mih tang namar ka jingkynshoit jong ki riew sain pyrthei.
Ia kane la pynpaw da u President ka Langpih Anchlak Gorkha Student Union u Bikash Chettri haba iakren bad u nongthoh khubor ka Shlem, uba la pynpaw “Ka jingsngew iapher jaidbynriew ka mih na ki riew sain pyrthei ym na ngi ki rit ki ria”.
Kane ka jingkynthoh une u Nongialam ki Nepali kala mih namar ka jingiai mih ki jingkynnoh ba ki Nepali ki ju thombor bad pyndik ia ki paid Khasi ha Langpih da ka jingiarap jong ki Pulit ka Assam.
U Bikash ula ong “Da ki phew phew snem ngi la shong la sah ha kane ka thaiñ, ngi imlang sahlang naduh dang khynnah, ngi la heh la san ha kane ka jaka, don ruh kiba la kha hangne naduh ki meiieit paieit jong ngi bad ngim ju don kano kano ka jingïakynad bad ki Khasi”.
“Ngi ki Nepali ngi la nang ïa ka ktien khasi bad ki khasi ruh ki la nang ban kren ïa ka ktien jong ngi, lada dei ba ngi ïashrut kumno kumno ruh ngi nang ban ïa sngewthuh lyngba ka jingïakren. Ka jingsngewpher jaidbynriew hi ka wan lyngba ki briew jong ka saiñ pyrthei, ym na ngi ki rit ki ria” ong u Bikash.
Haba iakren halor ka jingiapynbeit pud hapdeng ka Assam bad Meghalaya, u Bikash ula ong “Lada ki bor jong ka sorkar ki pynhap ïa ngi sha Meghalaya ne sha Assam ruh kam pher, ngi long kiba la kloi ban shu kohnguh, namar ngim don bor ei ei hynrei tang ban shu mynjur”.
“ Ka jingkwah jong ngi ka dei beit tang ban shong suk shong saiñ kumba ngi ju long baroh shi katta bad kam ju don kumta kata ka jingïakynad bad ki Khasi” ula bynrap.
Na ka liang u Rambahadur Chettri u ba dei uwei u riew tymmen u ba shong ba sah ha ka shnong kaba la tip kum ka Lawbah ne ka Harsha Nagar ha katei ka thaiñ, u la ong, “Haba ngi wan ha kane ka pyrthei ka dei tang kum ka jingwan iew ban thied ban pet. Ynda ngi la dep siew ngi hap ban phai biang sha la ïing, kumta ka jingim u briew ruh ka long kumta namar ngi hap ban phai biang sha ïing u kynrad. Nga sngew ban ong ba ka jingïakynad jong ngi kam don jingmut bad ngim ju don ruh kaba kum kata lait noh kiba malu mala ba ha ka jinglong briew ngim lah ban biang”.
Lah ban kdew hangne ba ha katei ka thaiñ, ki don bun tylli ki shnong kiba la synshar da ki jaidbynriew Nepali namar ka jingbun paid ba ki la don naduh ki phew phew snem mynshwa.
