Shillong, Nailar 23: U MLA bad u MDC ka Rambrai-Jyrngam Bah Kimfa S Marbaniang bad Bah Bajop Pyngrope, kila pynpaw ia ka jingkyrmen ba ka Sorkar Meghalaya Democratic Alliance (MDA) kan lah ban pynbeit noh shisyndon ia ka jingiakajia pud ha shilynter ka Jylla bad ka Assam.
Haba ai ia ki jingai jingmut, u Bah Kimfa ula ong ba ka Sorkar Jylla ka dei ban sngap lang ia baroh ha kane ka jingiakren pynbeit pud jong ka wat kaba ar.
“Watla ngi la duh ia ki katto katne ki Shnong ha ka Wat kaba nyngkong hynrei ngi dei ban pyrshang pat ban iakren biang ha ka Wat kaba ar ban lah pynphai biang ia ki sha Jylla” ong u Bah Kimfa.
Haba pynpaw ba ka Langpih ka dei ka jaka kaba jwat bha ban pynpeit, une u MLA ula ong ba ka Sorkar ka dei ban sngap lang ia ki jingai jingmut jong ki Sordar, ki Rangbah Shnong,ki Hima bad kiwei kiwei. U ong ba ki paidbah ki dei ban sngewthuh ia kaei ka jingthmu jong kane ka jingiapynbeit pud bad sa pan ia ki jingai jingmut kumba leh ha ka wat ba nyngkong.
Na ka liang u MDC Bah Bajop Pyngrope ula pynpaw ia ka jingkyrmen ba ka Sorkar Jylla ha kane ka kynti kan lah noh ban pynbeit ia kane ka jingiakjia bala neh da ki phew phew snem.
“Ngi la iohi ia shibun ki jingiakhih pyrshah bad jingkren ba ialam bakla na ki kynhun bapher bapher, kaba long pynban kaba sngewsih khamtam haba ki ong ba ha West Khasi Hills ngi la duh ia shibun ki jaka” ong u Bah Bajop.
Ula buh jingkylli balei ba kine ki briew kim iakren ba haduh katno ka Meghalaya kala ioh nong kum ka jaka ha Tarabari bad kiwei kiwei ki jaka.
“Ngi sngewthuh ba ngi la duh ia kito ki lai tylli ki Shnong hynrei ngi kyrmen ba da ka jingiakren, ngin sa pyrshang ban pynioh pat ia ki khnang ba ki jingiakhih kin sangeh noh. Kam dei satia kaba ngi die iala ka khyndew ka shyiap hynrei ka dei ka pop jong ka sorkar bala leit noh ba ngi hap kit pynban mynta” ong u Bah Bajop.
