Shillong, Naitung 28 : Ka tnad ka Koit ka Khiah ka jylla lyngba u Myntri James K Sangma ka kyntu ia ki nongtrei jong ka EMRI 108 hapoh ka lama jong ka Meghalaya EMRI Workers Union (MEMRIWU) ba ki dei sangeh noh mardor ia ka jingiakhih.
Katei ka jingiakhih jong ki nongtrei EMRI 108 ka long ban dawa na ka sorkar jylla ba kadei ban shimti bad pyniaid hi da ka tnad ka Koit ka Khiah ia kitei ki 108 ym ban aiti pyniaid biang ha ki agency lane ki kompeni ba na shabar kum kiba ka leh naduh kaba sdang.
Hynrei halor kane u Myntri u la ong ba u la dep ban pynshai ha ki ba ym pat don kawei ruh ka jylla ha ka ri ba ia ka EMRI 108 la pyniaid da ka sorkar.
“Ngi kyntu namarkata ia ki ba kin sangeh noh ka jingiakhih namar kumba phi iohi mynta ba ka khlam COVID ruh ka la nang kiew katba nang mih ki sngi” u la ong.
U Myntri u la pynpaw shai ruh ba da lei lei kin ym lah ban shimti pyniaid hi dalade ia ka EMRI 108 bad bynrap ruh da kaba pyntip ba ka jingwad da kiwei pat ki bor pyniaid ka la iaid shakhmat mynta.
