Shillong, Naiwieng 09: U MP ba marwei sha Rajya Sabha na Jylla Dr WR Kharlukhi hynnin ka sngi ba-ar, ula ban jur ba ka Sorkar Pdeng bad ka Sorkar Jylla, kila dei ban ailad biang ban tih dewiong thliew khnai ba kan bteng lada kim lah ban pyniaid ia ka jingtih da ka jingstad saian (scientific) hapoh ka Jylla.
“Ngan sa kren ia kane ka kam ha Parliament ba lada phim (Sorkar) lah ban leh (tih da ka jingstad saian), phi shah noh ia ki ban bteng ia ka jingtih khliew khnai. Lem kumta, balei ki briew jong nga kin mad jingeh tang namar ka jingbym biang ka policy hangne hangtai” ong u Dr Kharlukhi haba iakren bad ki nongthoh khubor.
Haba kylli halor ki jingktah na ka jingtih dewiong thliew khnai ia ka mariang, une u MP ula ong “Ki don ruh ki khep ba ngi hap ban peit kano kaba kham kor- ka jingim briew ne kiwei kiwie ki bynta. Lada phi ong ba ka jingim ki briew kam kordor te ka biang lane lada phi sngew ba ki paid riewlum kim don dor eiei ruh em ruh ka biang hynrei wat buh sah ia ki briew jong ngi kumne kumba long mynta”.
U Dr Kharlukhi ula ong ba naduh u snem 2014 haba ka National Green Tribunal (NGT) kala hukum ban khang ia ka jing tih dewiong thliew khnai ha Meghalaya, ka Sorkar Pdeng bad ka Sorkar Jylla kim shym la leh eiei ban sdang noh ia ka jingtih dewiong da ka jingstad saian haba bynrap “Ki dei ban pyni ba ki don ka jingkitkhlieh ruh”.
“Nga iohi ba ki paidbah ki hap ban mad ia ki jingjynjar khlem ka daw jong ki. La 40 tylli ki snem, la shah ia ka jingtih dewiong thliew khnai bad dei tang mynta ba ki shem ba ka long kaba don jingma. Balei, hato kim tip ne balei ba ka jingtih dewiong thliew khnai kala iaid ha Meghalaya” ula ong.
Haba pynpaw ia ka jingbym sngewtynnad, u Dr Kharlukhi ula ong “Naduh u snem 2014 haduh mynta, ka jingtih dewiong da ka jingstad saian kam pat shym la sdang satia. Mano ba bakla hangne la ka dei ka Sorkar Pdeng ne Sorkar Jylla. Kila dei ban shim ia ki sienjam lada ki kwah ban iarap ia ki briew jong ngi namar ka jingduhnong ka long kaba bun ia ki nongshong shnong ka Jylla”.
U Dr Kharlukhi uba dei ruh u President ka NPP-Meghalaya, ula ong ba ka Sorkar ka hap ban wad ia ki jingtip ban tip la ka jingtih dewiong da ka jingstad saian ne ka Open Cast ka iahap ne em ban pyntreikam hapoh ka Jylla.
“Hynrei, kala iaid la phra snem mynta naduh u 2014, ym shym la leh eiei bad ki nongshongshnong ka Jylla kila hap ban mad ia ki jingjynjar” ong u MP haba bynrap “Ka Sorkar Jylla kala pyrshang kat kaba lah ban pyllait na ka Iingkashari halor kane hynrei kaei kaba nga mut ong ka long ba dei ban ailad ne leh eiei noh”.
