Shillong, Naiwieng 08: U Symbud Myntri Rangbah ka jylla bah Prestone Tynsong ula pyntip ba ki kam ki jam kila iaid shakhmat mynta ban thung ia u Managing Director (MD) ba pura jongka Meghalaya Energy Corporation Limited (MeECL).
U Bah Prestone ula pyntip ba ka sorkar kala ioh pdiang 4-5 tylli ki aplikeshon hadien bala pynmih iaka jingpynbna lyngba ka Expression of Interest (EoI).
“Ngin ia peit shwa ia kitei ki aplikeshon ia kaba la phah sha u Chief Secretary uba long u Chairman jong ka Search Committee. Yn sa khmih bniah bad eksamin mano ban long u ba biang tam ban long u MD ka MeECL, ban pyniaid ryntih ia ki kam ki jam baroh” ong u Bah Prestone.
U bah Prestone u iathuh ba shen ka sorkar kan sa pynkhamti ha u MD iaka jingkitkhlieh ban khmih iaka Corporation ryngkat bad ki 3 tylli ki shnad treikam khnang ban lah ban pynbha bad pynkylla iaka rukom treikam jong ka MeECL.
Ha u bnai Jylliew, ka kynhun Myntri kala ai jingmynjur iaka jingtyrwa ban phiah noh iaka kyrdan Chairman – Managing Director (CMD) jongka Meghalaya Energy Corporation Limited (MeECL) na ka bynta ban pynbha iaka rukom treikam bad iaka rukom shakri jong ka Corporation ha ryngkat bad ki 3 tylli ki shnad jongka kiba kynthup iaka Meghalaya Power Generation Corporation Ltd (MePGCL), Meghalaya Power Distribution Corporation Ltd (MePDCL) bad ka Meghalaya Power Transmission Corporation Ltd (MePTCL).
U Chairman jong ka MeECL yn dei u Myntri uba khmih ia ka tnad Bording uba long u Non-Executive Chairman jongka Board katba u Chairman jong ki 3 tylli ki shnad treikam yn dei u Chief Secretary ne u Additional Chief Secretary ne u Principal Secretary uba khmih ia ka tnad Bording.
