Shillong, Naiwieng 08 : U Symbud Myntri Rangbah ka Jylla Bah Prestone Tynsong, dang shen ula lum ia ka jingialang bad ka National Highways and Infrastructure Development Corporation (NHIDCL) ban iabishar kam halor ka jingpyntrei ia ka surok Shillong-Dawki kaba 95 Km.
U Bah Prestone u iathuh ba ha ka jingialang, ka NHIDCL kala pyntip ba kala jan dep artad ka jingkhot tender ia ki artylli ki song treikam (two package) jong kane ka project.
“Ka NHIDCL shen kan sa mynjur noh ia ka Financial bid bad hadien kane, kan sa aiti noh ia ka work order kaba thymmai” ula iathuh.
Ka NHIDCL kala hap ban khot tender biang ia ka package 1 bad 5 hadien ba ki contractor ba ioh pyntrei ia kine ki kam, kila sangeh noh ia ka kam dang shen.
Kane ka surok ka dei kaba la bei tyngka da ka Japanese International Cooperation Agency (JICA) ha ka jingpynlut ba kot T.1187.5 klur. Kynthup lang ia ka bai jaka jong ka project, ka jingpynlut kala kot haduh T. 1377.5 klur.
