Shillong, Jylliew 21: U Myntri Khynnah ka Ministry of Minority Affairs John Barla hynne ka sngi ba-ar ula kyntu ia ka Sorkar Jylla ba kan phah ia ki jingtyrwa ba iadei bad ki kam pynroi ban kyntiew ia ka Jylla Meghalaya.
“Nga la kyntu ia ka Sorkar Jylla ba kan phah ia ka jingtyrwa. Nga iohi ba kam don satia ka jingtip kaba pura ia ki skhim ka Sorkar Pdeng ha kane ka Jylla” ong u Barla haba iakren bad ki nongthoh khubor ha Shillong.
Une u Myntri Khynnah ula ong “Ki don bun ki skhim ba khlem pyntreikam hapoh ka Jylla namar ka jingbym tip ia ki” bad bynrap ba ym shym don mano mano ruh kiba pan ia ka Padho Pardesh Scheme, kaba thmu ban airam haduh T. 20-30 lak ia ki samla pule kiba kwah ban leit pule ia ki Higher Education sha kiwei pat ki ri ka pyrthei.
U Barla ula ban jur ia ka jingdonkam ba ka Sorkar Pdeng bad ka Sorkar Jylla ki dei ban iatreilang na ka bynta ka roi ka par jong ki Nongshongshong ka Jylla.
Hapoh ka Ministry jong u, u ong ba ki don shibun kiei kiei kiba lah ban leh kum ka jingthaw ia ki Residential School, ki Hospital , ki Health Centre, ki Community Hall bad kiwei kiwei.
“Hynrei, ka jingtyrwa kan hap ban wan na ka Sorkar Jylla naba ka Sorkar Pdeng hi ka long kaba kloi ban iarap. Lada ki wan tang shiliang ka kjat, kin sa leit phai da baroh arkjat na ka bynta ka roi ka par jong ka Jylla Meghalaya” kular une u Myntri Khynnah.
U Barla u pyntip ba ka Ministry kala bei tyngka haduh T. 247 klur ban tei ia ki Stadium, Health Centre, Women Hostel, Sports Complex, Shopping Complex bad kine ki kam ki dang iaid shaid shaid mynta.
Halor ka jingiakynduh jong u ia u Myntri ka Koit ka khiah ka Jylla James P.K Sangma ha ka International Yoga Day ba long ha NEHU, u Barla ula ong “Ngi la iakren ia shibun kiei kiei bad nga la kyntu ia u ban phah sha nga ia ki jingtyrwa. Kin sa wan sha Delhi bad ngin sa iashong ban iasyllok halor ki kam pynroi na ka bynta ka lawei”.
Ha kane ka jingwan jong u ba saw sngi ha Jylla, u Barla ula iakynduh ruh ia ki Nongialam niam bapher bapher kiba don ha Jylla. Ula ong ba ki sengniam kila leh ia kaba kam kaba khraw bha da kaba pyniaid ia ki jaka pule, ki jaka sumar bad ki jingnoh syniang sha ka imlang sahlang watla kim shym la ioh jingmyntoi eiei ruh em na ka Ministry ba u khmih naba kim don jingtip ia ki skhim.
“Lada phim applai, kumno hi ban wan ka roi ka par ha Jylla Meghalaya” ula buh jingkylli bad ong “Nga la kyntu ia ka Sorkar Jylla ba kan pynlong ia ki jingialap paidbah halor ki shim bapher bapher kiba don ha ki Ministry jong ka Sorkar India.
