Shillong, Nailur 28 : Ka statistic halor ka jingdon ki nongpang HIV/AIDS bad Cancer ka dai ka kam kaba sngewbha jur, bad ka Meghalaya kala kham jur ban ia ka national average, ong u nongaibuit ka Tnad ka Koit ka Khiah bah Mayralborn Syiem ha ka sngi Nyngkong.
Une u MLA ka BJP na Nongpoh ula ong ba ki jingkhein ki ima bha ha East Khasi Hills, East Jaintia Hills bad Ri-Bhoi.
“Ka HIV/AIDS ka dei ka jingsngewkhia bad ka dei ka jingshisha bad ki jingkhein jingdiah jong ngi ki kham heh ban ia ka national average. Nga kwah ban kyntu ia ki para nongshongshnong ba kin wan shakhmat, leh test bad shim ia ki jingsumar. Kane ka long kaba kongsan” ong u Bah Mayral.
“Ngim dei ban sheptieng. Ka Sorkar bad ka Tnad ka Koit ka Khiah ka don hangne ban khmih ia phi bad pynthikna ba ngin pynduna ia kane ka jingkhein. Ia mynta, ka long kaba ima ha kylleng ki district khamtam ha East Khasi Hills, East Jaintia Hills bad wat ka Ri-Bhoi ruh kam jngai shuh shadien” ula ong.
U Bah Mayral ula pynpaw ruh ia ka jingsngewkhia halor ka jingbun ki nongpang bampong (cancer) ha Jylla.
“Ym tang ka HIV, ka cancer ruh ka dei kawei na ki jingpang ba bun bha ha kine ki sngi ba mynta. Kat kum ka jingkhein, ka jingiap namar ka cancer hapdeng ki shynrang, ngi wan ba-ar hapoh ka ri, bad napdeng ki kynthei, ngi wan ba 11” ula ong.
Ula ong ba ka jinglap dierpor namar ka jingbym shimkhia ia ki dak jingpang haba sdang kala nang pynsniew ia ka jinglong jingman.
“Haba sdang, ngi khein sting bha ia ki dak jingpang. Kiba bun ki nongshongshnong kim shimkhia satia. Ka jingkyrpad jong nga ka long ba kin wan shakhmat bad leh test ia ka cancer ruh” ula ong.
U Bah Mayral ula ong ba ka Meghalay State Cancer Society kala pynlong ia ki screening camp ha kylleng ka Ri-Bhoi District ban lap kloi ia ka jingpang ha ki nongshongshnong.
