Shillong, Nailur 28 : U MLA ka BJP na Nongpoh Bah Mayralborn Syiem ha ka sngi Nyngkong ula ong ba ki jingkylla ka suinbneng bad ki jingtei ba khlem the kyndon ki dei ki daw ha lyndet ka jingsahkut ka um bad jingshlei um ha Ri-Bhoi District bad kiwei ki jaka hapoh ka Jylla.
Haba kren sha ki nongthoh khubor, u Bah Mayral ula ong ba ka jinglong ka suinbneng ha kine ki ar-lai snem kala kylla bad ka jingkylla ka suinbneng ka dei ka daw bah, hynrei ki kam ba leh hi u briew kala nang pynsniew shuh shuh ia ka jinglong jingman.
“Ka don ka jingpom ia ki lum bad theh khyndew. Mynshuwa ngi don ia ki nala ba shna hi ka mariang kiba jylliew 15 phut, da ka jingnang bun briew, ki briew kila shna ia ki iing, ki dukan bad ki surok. Ka nala ba shna hi ka mariang kala hap bad jylliew satang 7 phut. Shano ka um kan leit? Kan pyrshang ban wad iala ka lynti iaid bad khatduh ka poi sha ka kamra shet jingshet naba kam don lynti na shawei pat” ula ong.
Une u MLA ka BJP u iathuh ba ula iashong jingialang bad ka Tnad Water Resources, PWD bad ka Urban Affairs ban weng ia kine ki jingeh ha ki sor kum ka Byrnihat, Nongpoh bad Jorabat.
“Kine ki dei ki sor rit ha kaba ia ki jakhlia la pyntuid sha ki nala wat ha ki National Highway.Ka jingioh ia ka umslap kala bun bha mynta haba ianujor bad ki snem bala leit noh bad ka jingtheh jakhlia ruh da ki nongshongshnong bad ki dukan, kala lam sha ka jingsahkut ka um ha ki nala” ula ong.
U Bah Mayral ula ong ba ka jingshlei um kam dei shuh tang ia ka Assam ne Meghalaya.
“Ka jingshlei um kam dei satia tang ha Jorabat, Shillong lane Nongpoh, hynrei ha Guwahati, Delhi, Banglaore ruh. Ka dei ka jingeh ba baroh ki mad mynta bad ka jingsngewkhia jong baroh hi” ula ong.
Halor ki lynti ban weng ia ka, ula ong “Ngi hap ban iashong pyrkhat lang. Donkam ban don ka policy, yn hap ban wanrah ia ki stad ki jhad bad ki Tnad bapher bapher kin hap mih shakhmat ban pynbeit ia kane ka jingeh”.
