Shillong, Nailur 28: Sa tang 6 bnai ban sah na ka bynta ban pynlong ia ka 27th National Games, ka Meghalaya kala pyniaid sted ban pyndep ia ki jingtei bad ki jaka sah na ka bynta ka lympung ialehkai kaba heh kaban long ha u snem 2027.
U Chairman ka Estimates Committee jong ka Assembly u Bah Mayralborn Syiem ha ka sngi Nyngkong ula lum ia ka jingialang halor ka jingpynkhreh jong ka tnad Sports and Youth Affairs.
“Ngi lah khmih ia ka jingpynkhreh na ka bynta ban pynlong ia ka 27th National Games ha Shillong ha u snem 2027. Ka Tnad kala pynshai ia ka committee shaphang ka jingpynklhreh” ong u Bah Syiem, uba long ruh u MLA ka BJP na Nongpoh.
Ula ong, ba ki jingtei kidei kiba la tei ym tang hapoh Shillong hynrei ha kylleng ki bynta jong ka jylla.
“Ki jingtei kidei kiba la pynkhreh ha kylleng ki jaka – Shillong, Tura, Jowai bad ha ki katto katne ki jaka jongka East Khasi Hills bad Ri-Bhoi ia kaba yn pynlong ia ki jingialehkai. La pynkhreh bad pyntbit ruh ia ki nongialehkai” ula ong.
U Bah Syiem ula kubur ba ka jingpynbiang ia ki jaka sah, ka bam bad ka leit ka wan kidei kiba shem jingeh hynrei ka committee kaa don pat ia ka jingkhmih lynti kabab ha, hadien ba kala ioh ia ki jingbatai kiba bniah.
“Kadei ka jingieh ia ka jylla hynrei ngi don ia ka jingkyrmen. Nga kyrmen ba baroh ki jingtei yn sa tei pyndep ha ki katto katne por. Ngi dang don por sa 6 bnai” ula ong.
Ha kane ka lympung iakob ialehaki kin don 39 tylli ki jait jingialehkai, ha kaba ka Meghalaya kan dei kaba pynlong ia katei ka lympung ialehkai katba ki jylla ka thain shatei lammihngi kin ioh ia ka lad ban pynlong mar kawei ka jait jingialehkai.
“Ngi don ia ka jingkhmih lynti ba ki samla nongialehkai kynthei bad shynrang ki jong ngi, kin ioh ia ki kabu kiba biang khamtam haba ka jylla kala bei tyngka shibun bha. U Myntri Rangbah bad u Myntri ka kam ialehkai kila shimkhia ban pynthikna ia ka bam kaba tei, jingai jinghikai pyntbit, ki Coach kiba napoh ka ri bad nabar ri khnang ba ngin lah ban wanrah burom ia ka jylla da kaba ioh ia ki takma ksiar, rupa bad rnong” ong u Bah Syiem.
