Shillong, Nailar 12: U Symbud Myntri Rangbah ka Jylla Bah Prestone Tynsong hynne ka sngi thohdieng, ula kyntu ia ka Sur ka Bri U Hynniewtrep ba kan ym pynmih ia kano kano ka jingkulmar ha kano kano ka prokram ba ka leh ban kynmaw burom ia u Nongialam barim ka HNLC Bah Cheristerfield Thangkhiew.
U Bah Cheristerfield ula shah siat iap ha ka 13 tarik Nailar jong u snem bala lah hala ka jong ka Iingsah ha Mawlai Kynton Massar ha ka jingkhynra jong ki Pulit. Ka Sorkar kala thung ia ka Judicial Inquiry bad ka thmu ban sei paidbah ia ka kaiphod ha ka Dorbar jong ka Iingdorbar Thaw Ain ka ban long ha u bnai ban sa wan.
Kane ka Kynhun (SKBUH) kala kyntu ia ki Nongshongshnong ka Mawlai ban pynher lama iong lashai ka sngi ha 13 tarik Nailar ha ka jaka jong ka Lama Lai Rong ka RI ban rakhe ia ka jingdap snem u Bah Cherist.
Haba kynthoh ia kane, u Bah Prestone ula pynkynmaw ba ula dep kyrpad ia ka SKBUH dang shen ba ki lah ban leh ia kaei kaba ki kwah ban leh ban kynmaw burom ia u Bah Cherist hynrei ka dei pat ban long kaba jai jai.
Haba kylli ba la dei ban pynlong ia ka Dorbar Kyrpang jong ka Iingdorbar ban iakren ia kane ka kaiphod jingtohkit, u Symbud Myntri Rangbah ula ong ba ka jingiakren ia ka Dorkar Kyrpang kam mih satia.
“Kam dei kaba suk ban pynlong ia ka Dorbar Kyrpang. Ka sah satang katto katne sngi mynta ba ngin sa rah ia ka kaiphod jingtohkit ha ka Iingdorbar Thaw Ain” ula ong.
“Ngin rah ia kane ka kaiphod ha ka sngi ba nyngkong eh jong ka Dorbar bad ngi dei ban long kiba iai shah ha kaban ap ia kane ka sngi” ula ong.
