Shillong, Iaiong 30 : U bah Wellbirth Rani, kum u Khun Rangbah ba trei monsngewbha na ka Kur Rani, ula buh ka jingkyntu iala ka jong ka Kur ba kan husiar bad peit pyrman bha iala ka jait ka khong khnang ba kan lah tehlakam ia ka jingtuh jait jong ki nongwei nongar ki bym dei ki Khasi.
U Bah Wellbirth uba dei u President barim ka FKJGP, ula buh ia kane ka jingkyntu haba ai jingkren hapoh ka Dorbar Pyllun (General Meeting) jong ka Sengkur Rani Thain Tyrsad, kaba long ha ka 27 tarik Iaiong ha Madan Sohjhursaw, Tyrsad.
U Bah Wellbirth ula pyntip ba ka jingtuh ia ka jait Khasi da ki briew nabar ka Jylla kala jur bha mynta ha Jylla bad kane ka la ktah jur ym tang ia ki kur kiba shah tuh jait hynrei wat ia ka Jaidbynriew baroh kawei.
Ula ong ba kane ka jingtuh jait Khasi da ki bar Jylla kala jur bha ha ki jaka khappud jong ka Jylla.
“Kine ki briew kila ioh shibun ki jingmyntoi da ka jingpynithuh ialade kum ki paid riewlum ka Jylla bad kila knieh noh ruh ia ka bhah kaba dei ka hok jong ki paid Khasi” ula ong.
Namar kata, ula kyntu ia ka Kur lajong ban husiar bad peit pyrman bha khnang ban nym ailad ia ka jingtuh jait da ki briew kiba die nabar ka Jylla.
Ha kane ka sngi, ka Dorbar Pyllun kala pynkup burom ruh ia ki 6 ngut ki dkhot ka Kur kiba la kynjoh ia ka 75 snem ka rta, nalor ki 16 ngut ki samla ba ioh 1st Division ha ki eksam u snem 2023 lem bad uwei u samla ba ioh khur takma ksiar na ka 5th Meghalaya Games ba dang shu dep shen.
Kane ka jingpynkup burom ia ki ba la kynjoh 75 snem bad ia ki samla ba pass bha ha ki eksam bapher bapher, ka dei kaba ju pynlong manla u snem da ka Seng Kur.
Ia kane ka jingialang la pyniaid da u Dr PS Rani bad kiba la ai jingkren ki kynthup ia u Bah ED Rani uba dei u Secretary ka Kur uba la ai ia ka report treikam jong ka sengkur, u Germany Rani bad kiwei kiwei.
