Nongpoh, Ïaiong 30 : Ka Ophis u Disrict Sports Officer ka Ri-Bhoi District, kala pynbna ban pynsangeh shuwa ia ka lympung ialehkai District Level Inter School Athletic Meet 2024 bala buh ban pynsdang lashai ka sngi namar ka jingshit kyr-ang palat ka sngi.
Haba kren sha ki lad pathai khubor, u Bah Bobby L Nongbet, District Sports Ophisar ka Ribhoi, u la ïathuh ba kane ka lympung ialehkai ka dei kaba la buh ban pynlong naduh ka 1 tarik Jymmang haduh ka 3 tarik Jymmang.
U iathuh ba u Deputy Commissioner ka Ri-Bhoi, ula bthah ia ka Ophis ba kan hap pynsangeh noh shuwa ia kane ka lym pung ialehkai namar ba jur palat ka jingshit.
U Bah Bobby u pyntip ba ha ka jingshisha, ka Ophis kala long kaba la pynkhreh ban sdang noh ïa katei ka lympung lashai ka sngi hynrei hadien ba la wan ka jingbthah naka liang u Deputy Commissioner, la hap ban pynsangeh noh shwa.
U DSO la Ribhoi u la kyntu ïa baroh ki rang bad ki thei ïalehkai kiba thmu ban ïa shim bynta, ba kim dei ban duh mynsiem hynrei ki dei ban nang ïai trei shitom bad minot shuh shuh bad naka liang ka ophis u DSO kin sa pyntikna ïaka tarik ba kin sdang.
U Bah Bobby u la kyntu ruh ïa baroh ki khynnah ba kim dei ban kheiñ sting ïa kane ka jingshit hynrei ki dei ban ïada ïalade bad ban bud ryntih katkum ki jingbthah khnang ba kan nym don kano kano ka jingktah ïaka bor met.
