Shillong, Rymphang 22: Ka Shillong All Faiths Forum hynne ka sngi kala kyntu iaki para ba ngeit ban pyndonkam hok iaka hok ban thep Vote ka ban long haka 27 tarik mynta u bnai bad ban jied iaki nongialam kiba sheptieng ia u Blei bad kiba don ka mynsiem ban shakri hok ia u paidbah.
Ka kyrwoh bala wan na u president ka SAFF u Bishop P Lyngdoh ka kyntu ruh iaki paidbah ban ban kiar na kino kino ki kam sniew, ban kiar na ka jingshah pynbeij haka bor pisa bad ban leit thep Vote daka jingkynmaw ia u Blei bad daka jingkhuid jingsuba naka bynta ka bha ka miat jong baroh bad ka jylla baroh kawei.
“Lada ki paidbah kim ngop haka bamsap bad ki pyndonkam hok iaka hok ban thep Vote ka jylla ruh kan ioh iaki nongialam ki bym ngop haka bamsap bad kane kan wanrah jingbha iaka jylla baroh kawei khamtam haba iadei ban kyntiew iaka roi ka par hapoh ka jylla bad dei namar kane ki paidbah ruh kidei ban tip briew tip Blei haba ki leit ban thep Vote” la ong ka kyrwoh.
U Bishop P Lyngdoh ula ong ba ki nongialam jong ka jylla ki don ka bynta ban leh naka bynta ka bha ka miat ki paidbah ka jylla Mgehalaya bad ka ri India baroh kawei naka bynta ban kyntiew iaka bha ka miat.
“Kum ki briew ba tip briew tip Blei, ngi donkam ban pan bor na u Blei ban ialam lynti ia ngi ban leh naka bynta ka bha ka miat jong baroh” ula ong.
