Aizawl, Nailur 19 : Ka sorkar Mizoram kala bthah ia ki nongshong shnong ka Myanmar kiba shong riehtngen mynta ha ka jylla ba kin ym thied jaka puta, ki iing ki sem ne ban leh ia kino kino ki kam khaii pateng khlem da ioh ia ka jingbit na ka sorkar jylla.
Ha ka hukum ba la pynmih dang shen da ki bor district ka Aizawl la ong ba la khang pyrshah ia ki phetwir napoh Myanmar ba kin thied jaka ne iing khlem ka jingtip bad khlem ka jingioh jingbit na ka sorkar.
La bthah ruh ia kine ki phetwir ba kim dei ban leh ia kino kino ki kam khaii pateng khlem da ioh jingbit na ka sorkar jylla bad ruh ba kim dei ban don bynta ha ki kam khaii beain, ong ka hukum.
Nalor kata la kyntu ruh ia kine ki phetwir ba ki dei ban pyntip ha kaba iadei bad ki kali ki jong ki, kiba kila wanlam ryngkat sha kane ka ri sha ki nongialam shnong ne ki komiti kiba khmih ha kaba iadei bad ki phetwir napoh Myanmar.
La khang pyrshah ruh ba kin pynrung kyrteng Aadhaar lane ha ka list thep vote na ka bynta ban ioh laisen niah kali nalor kiwei pat, ong shuh shuh ka hukum.
Na ka liang ka sorkar kala bthah ruh ia baroh ki komiti hapoh ki shnong ki thaw ba kin pynthikna ban pyntreikam pura ia kane ka hukum bad ban ai ia ka kaiphot sha ki chairman jong ki district kiba khmih halor ki phetwir ka Myanmar ioh don kano kano ka jingpynkhein ia katei ka hukum.
Na ka liang u Myntri kam pohiing u Lalchamliana dang shen ula pyntip hapoh ka dorbar assembly ka jylla ba kila don haduh kumba 30,401 ngut ki nong Myanmar kiba la wan shong riehtngen hapoh Mizoram naduh ba ki shipai junta ka Myanmar kila kurup noh ia ka bor synshar ha u bnai Rymphang jong ka snem ba la dep.
Ki nongshong shnong ka Myanmar ki dang iai bteng ban wan poi sha kane ka jylla kat haduh kine ki sngi, kata hadien ba kala mih ka jingialeh markylliang hapdeng ki shipai Myanmar bad ki riewialeh pyrshah, ong ka khubor heh sorkar.
Ka Mizoram ka iasam ia ka jaka khappud kaba 510 km bad ka Myanmar.Kine ki nongshong shnong ka Myanmar kiba la wan phetrieh shapoh Mizoram kham bun ki dei na ki jaitbynriew Chin ki ba don ruh ia ka jingiadei na ka jinghiar pateng kaba la rim bah bad ki jaidbynriew Mizo.
Kiba bun na kine ki phetwir kila don ha ki ktem sah shipor ba la pynkhreh da ka sorkar bad ki bor shnong, katba kiwei pat kila shongwai da lade hi bad kiwei pat kila shong la sah bad la ki jong kiba haiing hasem.
Na ka liang ka sorkar kala pynkhreh haduh kumba 156 tylli ki ktem sah shipor ha ki bynta bapher bapher ka jylla, ong ka khubor sorkar.
Kine ki nong Myanmar kila ioh pdiang ruh ia ki jingiarap kum ka bam ka dih bad kiwei pat na ka sorkar jylla, ki kynhun seng bhalang, ki balang bad ki bor shnong.
Nalor kata kine ki phetwir kila ioh pdiang ruh ia ki ningiarap na ka National Unity Government of Myanmar, ki kynhun seng kiba na bar ri bad na kiba haiing hasem ki jong ki kiba shong ba sah shabar ri, ong shuh shuh ka khubor heh sorkar.
Kat haduh mynta ka sorkar jylla jylla kala pyllait ia ka jingiarap kaba la kot sha kaT. 380 lak na ka bynta kine ki phetwir nong Myanmar.
Ha ka snem ba la dep, na ka liang u Myntri Rangbah ka jylla u Zoramthanga ula kyntu ia ka sorkar pdeng ba kan ai ia ka jingiarap na ka bynta kine ki phetwir nong Myanmar.
