Shillong, Rymphang 22: Ka Khasi Jaintia Church Leaders Forum (KJCLF) hynne ka sngi Balang, kala kyrpad ia ki paidbah ka jylla ba kin pyndep hok iala ka kamram ha kaban jied ia ki nongmihkhmat daka jingiatiplem kaba shai bad kaba bha bad ban jied ia ka Sorkar kaba don ka mynsiem ban shakri na ka bynta ka bha ka miat bad ka lawei ka Jylla.
Ha ka kyrwoh khubor, u Secretary ka KJCLF u Rev Dr EH Kharkongor ula pynpaw “Kum ki nongshong shnong ka Jylla, baroh ngi ia don bynta lang ha ka shalyntem kaba tyllun shisien san-snem ha kaba don ka jingpynrem bad ka jingiaroh, ki jingainia mar kylliang, ki jingthew jingwoh bad ki jingpyrto ban leh kham bha bad kiwei kiwei de. Ia ki mat treikam la tyrwa lyngba ki jingkren, ki drama bad hateng hateng ruh ha ki sur jingrwai ba sngewbang watla kaba khambun hi ka long ha ki jingsawa kawkaw kiba palat ia ka bor jong ki briew ha shnong ha thaw ban shahskhor”.
U Rev Kharkongor ula pynpaw ba don ki jingkren ne jingleh kiba ktah bad pynsngewsih ia ka jingsngew mynsiem jong ki briew shimet, donkam ban buh jingkylli tyngeh bad bishar bha!
“Ki dkhot jong ka Khasi Jaintia Christian Leaders Forum (KJCLF) ki sngew bynniaw shibun eh halor ka jingpyndonkam bakla ia ka sur jingrwai ba kynja mynsiem “Nga la kut jingmut ban bud i’U Jisu” da uwei u kyrtong bad ka party jong u bad kiwei kiwei de kiba syriem ia kane. Kane ka jingleh pharshi ba khlem jingpyrkhat ka buh ia ki jingkylli halor ka jinglong rangbah jingmut bad ka jingdonburom jong une u kyrtong bad ka party jong u, bad dei ki paidbah ki ban rai” la ong u nongialam ka KJCLF.
Ka Forum ka kyntu ia baroh kiba don bynta ha kane ka elekshon ban kiar na kiba kum kine ki jingleh ne jingkren, na ki jingshukor bad ban kiar rai-eh rai-dam ia ki jingialeh jubor.
“Ka KJCLF ka khot bad pynshlur ia ki nongshong shnong ba ha ka sngi thep vote ban pyndonkam thikna ia la ka jong ka hok ban jied nongmihkhmat da ka jingiatiplem kaba shai bad kaba bha. Kane ka long da ka jingsngewthuh bad jingtip ba ki paidbah kin jied ia ka Sorkar bathymmai ka ban aiti hok sha ka jingshakri bad ka lawei jong ki nongshong shnong ha ka Jylla khlem da don kano kano ka jingleh shilliang lane ka jingniew-kiar ia kiwei, bad ban pynskhem ia ka suk ka saiñ ha ka ri” la pynkut ka kyrwoh na u Secretary ka KJCLF.
