Shillong, Nailar 21: Ka Hynniewtrep Youth Council (HYC) hynne ka Sngi U Blei kala kyntu ia u Myntri Rangbah ka Jylla Conrad Kongkal Sangma ba um dei ban shah pyniaid ha u Myntri Rangbah ka Assam Himanta Biswa Sarma hynrei ban pynthikna ba baroh ki shnong ba shongshnong da ki paid Khasi-Pnar ki dei ban wan phai biang sha Meghalaya ha ka jingiakren pynbeit pud jong ka wat ka ba-ar bad ka Assam.
Ha ka kyrwoh bala phah hynne ka Sngi U Blei, u President ka HYC Robertjune Kharjahrin ula ong “Ngi kyntu ia u Myntri Rangbah jong ngi bad ia ka Sorkar ban ym long tang kum ka trailer jong ka Jeep ka Assam bad shah pyniaid kat kaba u Myntri Rangbah ka Assam ne ka Sorkar jong u ka wanrah ban iakren.
“U CM jong ngi u dei ban ieng ha ka nongrim kaba skhem ban pynthikna ba baroh ki shnong ba shongshnong da ki Khasi-Pnar bad ki jaka kiba hap hapoh ki Hima ba dei ban wanrah biang sha Meghalaya khnang ba baroh kin pdiang ia kane ka jingiapynbeit pud” ula ong.
Haba pynpaw ba ka HYC kam pyrshah satia ia ka jingiapynbeit pud bad ka Assam, u Robertjune ula ong “Hynrei ngi ieng skhem ha ka jingdawa ba kano kano ka jingiapynbeit ne ka rai ban phiah ia u pud u sam ka dei ban leh da ka jingiamynjur lang jong baroh kiba don bynta khamtam ki Hima bad ki Autonomous District Council”.
U pynpaw ba ka HYC ka kyntu ia baroh artylli ki sorkar Jylla ban iakren ruh shisien iakren ia baroh ki hynriew tylli ki jaka ba dang sah-Nongmynsaw ( Langpih ) , Block 1, Block 2, Psiar & Khanduli , Deshdomria ( Raid Khadar Bongthai) , Baridua & Nongwah Mawtamur –ym ban iakren toit toit ne tang kawei ne ar tylli bad iehteng biang ia ki katto katne ha kane ka wat iakren kaba ar.
Ula maham lypa ruh “Lada ka Sorkar kam sngap lang ia ki jingai jingmut jong baroh ki kynhun ba iadon bynta hashuwa ban iasoi ia kino kino ki kot ki sla ha kane ka wat iakren kaba ar, kan dei ka kam ka bym lah satia ban pdiang”.
Une u Nongialam ka HYC ula pynkynmaw ba ha ka wat ba nyngkong, la shem ba ka sorkar kam shym la bud kat kum ki san tylli ki nongrim haba pynmih ia ka rai kata ban iaid kat kum ka histori jong ki jaka, ki briew ba sah ha kine ki jaka, ka jingsuk ha ka synshar khadar bad ka mon u paidbah.
Kat kum ka jingong jong u, ka sorkar kala shu ai kongsan eh tang ha ka “mon u paidbah” kiba sah ha kine ki shnong kiba shah ktah, kiba ha ka jingshisha ki dei tang ki nongshongwai, ki bym dei satia ki trai jaka jong ka khyndew ka shyiap ki Hima Khasi.
