Nongstoiñ, Rymphang 9: Ka Federation of Khasi Jaiñtia & Garo People Rambrai circle, kala kyntu ia ki paid nongthep vote jong ka constituency ba kim dei ban ngop ha ka jingshah pynbiej ha ka tyngka pliah ha kane ka elekshon MLA-2023 ban long la 27 tarik Rymphang khnang ba ka elekshon kan long kaba khuid.
Ka FKJGP-Rambrai Circle kala kyntu ïa ki paitbah ba ki dei ban pyrkhat sani bad puson bah shuwa ba kin leit thep ïa ka vote jong ki bad haba ki leit thep vote kim dei ban pyrkhat ba kin ïoh ei ei na ki kyrtong.
Ka la kyntu ruh ba ki paitbah ki dei ban shim ba ka shi vote ka jong ki ka dei kaba kordor bad kim dei ban shah pynbiej ha ki tyngka pliah jongno re jongno la ki dei ki kyrtong ne ki dei ki nongtrei jong kano kano ka seng saiñpyrthei namar lada ki bakla, ka jingduh nong kan long ka jong ka constituency bad jong ka jylla hi baroh kawei.
U bah Shanbor Nongphud General Secretary ka seng haba kren ha ki ladpathaikhubor u la ong ba ha kine ki sngi bala dep, ka seng ka la ïoh jingtip ba ki don ki kyrtong kiba la thong da ka pisa ïa ki nongthep vote bad ki pynbiej ruh da ki bun jait ki jingkular kumta u la ong ba na ka liang ka seng kan ym pdiang da lei lei ïa kum katei ka jingleh.
Utei u nongïalam ka seng u la ong ruh ba ki paitbah ki dei ban da bishar bha ïa uba kum uno u kyrtong uba ki ibit ban jied kum u nongmiohkhmat jong ki namar lada ki shu jied khglem da bishar bha, kan wanrah ïa ka jingduh nong kaba khraw ïa ka constituency khamtam eh ka Rambrai Jyrngam kaba dei ka constituency kaba dang sahdien bha.
