Nagaon, Naitung 15 : U Rana Pratap Boruah president ka Asom Jatiyatabadi Yuba Chatra Parishad (AJYCP) u la kyntu ia u Myntri Rangbah (CM) ka Assam u Dr Himanta Biswa Sarma ba un tuklar lem ha ka ba iadei bad ka jingjia ia ka Barshashree Sodiakhuwa Burhagohain ka ba la shah set phatok naduh kine ki ar bnai ba la dep khnang ba kan ioh lait noh bad ban pyndep ia ka eksamin B. Sc. second semester ka ban long ha une u bnai u ban wan.
Ha ba kren sha ki katto katne ki lad pathai khubor ha ka ophis treikam ka AJYCP hapoh ka district, u Boruah u la ong ba kane ka samla pule kam pat shym la leh satia ia kino kino ki kam pynshit paidbah, hynrei ka la pynpaw ia la ka jong ka jingsngew jong ka.
“Ka jingshah pynngat jong kane ka samla ha ki kam pynshit bad kynshoit paidbah ha ki bor sorkar ka long ka ba sniewbok shibun,” ong u Boruah, u ba la bynrap ruh ba lada ki bor pulit ki pyrshang ban khanglad ia ki riew paidbah ba kin pynpaw ia ki jingsngew jong ki, ki paidbah shisien ka sngi kin sa mih sha ki lynti surok.
Kumta ruh na ka liang une u nongialam ka AJYCP u kyntu jur ia ki bor sorkar ba dei khmih kumjuh ia u CM ka jylla na ka bynta ban pyllait noh mardor ia kane ka samla pule na ka jingshah set phatok khnang ba kin ym mih kino kino ki jingiakhih paidbah.
Kane ka samla pule ka la shah set phatok tang namar ba ka la thoh ia ka poetry ka ba pynpaw ka jingkyrshan ia ka kynhun seng lehnoh ULFA(I) ia ka ba ka la pyllait lyngba ka Facebook naduh kine ki khyndiat bnai ba la dep.
