Shillong Jymmang 22: U Myntri ka tnad Bording u AT Mondal hynne ka sngi Palei ula ong ba ka Meghalaya Power Generation Corporation (MePGCL) kala don ha ka kam na ka bynta ban pynkhuid noh ia ki niut ki nier bad ia ki jaboh kiba la dap smam, kiba la wan tuid lyngba ka Wah Ganol hadien ka jingther u lapbah bad kane ka la ktah ia ka projek pynmih bording.
Haba iakren bad ki nongthoh khubor, u Mondal ula ong, “Kam dei satia tang ba ka long kaba isaitmet hynrei kadei ruh kaba ma na ka bynta ka jingpynmih ia ka bording bad na ka bynta ka jingshngain jong ka Ganol Dam, namar kine ki jaboh ki lah ban pynmih ia ka jingeh ia kane ka projek ruh, ki lah ban poi ruh wat sha ki Power House bad kin buh jingeh ia ki kor ki bor kiba ngi pyndonkam. Kumta ngi donkam ban weng noh mardor ia kine ki jaboh jabain”.
Ula ong, “Kane ka jingjia jong ka jingwan tuid ki niut bad ki jaboh sha ka damsite jongka Ganol kam dei ha ka sien kaba nyngkong namar haba don ka jingther u lapbah, ka um slap na ki jaka kiba marjan ka rah bad kit ia ki niut ki nier kiba la lang ha ki iew ki hat, ki homestay, jaka bamkhana bad kiwei kiwei bad ki wan tuid lut sha ka Wah Ganol”.
Ula ong ba kane ka jinglong jingman ka long kaba sngewkhia bha la ong u Myntri ka tnad Bording bad ka bynrap, “Nga lah iakren khah khah bad u Deputy Commissioner bad nga lah bthah ba dei ban shimkhia noh mardor bad u DC ula leit hynin ka sngi ban jurip ia kane ka jaka bad lashai ka sngi yn phah ia ki BDO ban pynsngewthuh ia ki paidbah kiba sah ha ki bynta kiba shajrong jong ka Wah kynthup ia ki Homestay, ki iew ki hat ban ym bret pathar ia ki niut ki nier. Ngi hap ban bteng ban khmih bniah ia kane, lem kumta kane kan iai bteng ban jia haba don ka jingslap abd kan rah lut ia ki jaboh sha kane ka wah”.
U Mondal ula ong ba ka MePGCL kala don ha ka kam ban sdnag noh abn pynkhuid ia kine ki niut ki nier bad ia ki jabpoh jabain kiba la lang ha kane ka wah naduh lashai ka sngi.
“Kila wanrah ia ki briew kiba don ia ka jingtbit sha katei ka jaka bad naduh lashai ka sngi ha ka por mynstep kin sdang ia ki kam ban pynkhuid ia kane ka wah” ula ong.
Nalor kane, u Myntri ula shimkhia ruh ia kane ka mat bad u Myntri Rangbah u Conrad K Sangma bad ong, “Nga lah iakren bad u Myntri Rangbah bad ula mynjur ba ngi dei ban don ia ki kynja atiar kiba biang kiba lah ban lait na kum kitei ki jingjia ba kin jia biang”.
