Shillong, Jymmang 22 : Ka Sorkar Jylla kala pynbna ba kan khang shipor ia ka jingiaid ki kali na ka surok hapdeng ka Laitlyngkot-Langkyrdem, ka ban treikam hynriew kynta shiteng haduh 5 sngi lynter.
Kane ka jingkhang iaid kali kan long naduh ka 26 tarik Jymmang haduh ka 30 tarik Jymmang, pynbna u Sub Divisional Officer (C) Pynursla Civil Sub Division.
Ula pyntip ba ka por ban khang ia ka jingiaid ki kali ha shilynter jong kane ka surok (Laitlyngkot-Langkyrdem) kan long hapdeng ka por 7 baje mynstep haduh 10 baje mynstep bad 12:30 mynsngi haduh ka por 4 baje janmiet.
Une u Ophisar ula pyntip ba kane ka jingkhang ia ka surok ka long kaba donkam na ka bynta ban pynthikna ia ka jingiaid beit iaid ryntih ka kam shna surok, khamtam eh, na ka daw ka jingdon jong ki bynta ba syier ha shi lynter ka surok kiba donkam ban pynkhuid bad pynbha.
La kyntu jur ia ki nongleit nongwan ba kin kiar na ka leit ka wan ha ka por miet ha kine ki bynta jong ka surok kum ka jing shim jingiada lypa na ka daw jong ka jingap jingma namar ka jinglong ka surok bad ka suinbneng.
La kyrpad ruh ia ki nongleit nongwan ba kin ai ka jingiatreilang bad ban khreh biang por lypa iala ka jingleit jingwan ha kine ki sngi bad ki por bala buh bad kumjuh ruh ba kin bud ryntih ia kitei ki jingkyntu ba kin kiar n aka jingiaid jingieng ha ka por miet na ka bynta ka jingmyntoi lang jong uba bun bad ka jingpyndep biang por ia ka jingshna surok.
