Shillong, Naitung 12: Ka Khun Hynniewtrep National Awakening Movement (KHNAM) kala kynthoh tyngeh ia ka jingpynjari kyndon 144 CrPC ka Deputy Commissioner ka East Khasi Hills ha Nongbah Shillong bad ong ba kane ka hukum ka dei ka jingphla bad jingkubur ba ka Sorkar bad ka Tnad Pulit kim lah satia ban tehlakam ia ka huri hura bad wanrah ia ka shongsuk shongsain ha ka Jylla.
Kane ka jingkynthoh kala mih tang shisngi hadien ba ka Deputy Commissioner Kong RM Kurbah, kala pynbna ba ka Nongbah Shillong kam long shuh kaba shngain haba kyntu ruh ia ki paidbah ba kin iarung noh shala iing hapoh ka 10 baje mynmiet.
Ka Deputy Commissioner kala pynjari ruh ia ka 144 CrPC ba khang ia ki dukan kynthup ki dukan bam ba kim dei shuh ban plie ia palat ka 10 baje mynmiet.
“Kane ka jingpynbna ka DC ka pyrta jam ba ki shnat pulit kim long kiba tbit bad kim lah ban iada ia u paidbah u ba siew tulop ia ki. Ka sorkar ka kwah ba set ia ki paidbah ha ki iing ki jong ki, ban don ka shongsuk shongsain, lada ha kane ka rukom te wat ki lehnoh ruh ki lah hi ban wanrah ka shongsuk shongsain balei ngi donkam pulit” ong u Working President ka KHNAM Bah Thamas Passah.
Ka KHNAM ka pynrem jur ia kane ka lynti khawpud kaba ka sorkar ka la shim bad ong “Na ka daw ka jingkyrduh kam bad ban pyrshang ban ieng hala ki kjat bad ban kyrshan ban bsa ia la ka iing, ki paidbah kila pyrshang ban trei miet da kaba plié dukam bam ban bsa ka iing ka sem wat la ka dei ha khyndailad lane ha Laitumkhrah lane ha kiwei kiwei ki jaka”.
“Mynta tang naka daw kita ki ba buaid miet bad ba pynklumar bad namar ba ka police department kam lah ban teh lakam, ka long mo kaba shongnia ban shu phah khang dukan ia baroh bad ban pynbor ia ki ban thiah khlem bam” ula bynrap.
Une u Nongialam ka KHNAM ula buh jingkylli “Balei la phah khang tang ia ki dukan jong ki rit ki ria ki dukam die marbam, balei khlem phah khang pat ia ki pup/disco ki jaka ia dih buaid? Hato lada bamja ha rud surok ha khyndailad lane Laitumkhrah shipliang ka pynbuaid mo”.
Haba dawa ia ka Sorkar/DC ba kan weng noh mar mar ia kane ka hukum, u Bah Thomas ula ong “ Ka 144 CrPC bad ka jingpynbor ia ki dukan ban ym plié hadien ka 10 baje mynmiet kadei ka jingpyrshang jong ka sorkar ban khanglad ia ki paidbah ban kamai ban bsa bad ban pynim ia la ka iing ka sem bad kane ka jingkhanglad jong ka sorkar kadei ka jingpynkhien ia ka hok jong ki paidbah ka ba la aibor da ka artikil 21 jong ka riti synshar ka ri India”.
U Bah Thomas ula ong ba lada ka Sorkar/DC kim weng noh ia kane ka hukum, ka KHNAM kam pynlehrian ia u Myntri Rangbah/NPP/UPD/HSPDP/BJP ha ka iing kashari.
