Imphal, Naitung 12: Ka kynhun ki 31 ngut ki MLA ka Manipur, kila shim rai ban kyrpad ia u Myntri kam Pohiing Amit Shah ba un shim ia ka rai ba khatduh ka ban wanrah pat ia ka jingshongsuk ba shirta hapoh ka Jylla.
Kine ki MLA kila tyrwa hakhmat u Myntri kam Pohiing ban bujli noh ia ka 9th Assam Rifles, 22nd Assam Rifles bad ka 37th Assam Rifles da kiwei pat ki central security force kiba kham pynleit jingmut ban wanrah ia ka jingiatylli hapoh ka Jylla.
Kila ong ruh ba ki don ki jingsngewkhia halor ki kam bala leh da ki Assam Rifles, kiba la buh mynta iaka jingma halor ka jingpyrshang ban wanrah ia ka jingiatylli hapoh ka Jylla.
Kine ki Nongmihkhmat kila phah ruh ia ka shithi sha u Myntri kam pohiing ba kyntu ban pynlong ia ka jingtohkit kaba bniah halor ka jingrah ki riew paidbah ia ki tiar siat bad ki kuli ha ka peace march bala pynlong ha ka 5 tarik Naitung ha Churachandpur.
Ka pynmih ia u dak jingkylli uba heh halor ka thymmei jong kine ki tiar siat bad ki kuli bad ruh ia ka jingioh jong ki briew ban rah tiar siat kaba trei borbah ha kane ka jingiaumsnam. Ki MLA kila pynpaw ruh ia ka jingsngwkhia halor ka jingdon kam ban leh eiei ia kane ka kam khnang ban lah pynduhjait ia ka jingrah tiar siat.
Ki MLA kila kyrpad ruh ban leh noh da kaba tyngeh pyrshah ia ki kynhun kaikhlaw/ ka jingiakynthih pud jong ki kynhun kaikhlaw kiba treikam hapoh ka Jylla khnang ban lah wanrah ia ka jingsuk.
Nalor kane, kila kyrpad ruh ban pynkhlain ia ki bor pahara kum ka jingpyniaid pahara ha ka surok NH2 ban nym don jing thut ka jingpynpoi ia ki mar ki mata na ka bynta ki nongshongshnong ka Jylla.
La kyrpad jur ba ka Sorkar Pdeng ka dei ban pyndep noh kham kloi ia ka jingker sainar shah ha khappud ka Indo-Myanmar.
Pule ruh:Â Assam : Pyntip u DGP ba shah wengkam haduh 24 ngut ki Pulit naduh u Rymphang 2023
