Shillong, Naitung 17 : Ka Khasi Students’ Union (KSU) ha ka sngi U Blei ka la kynthoh ia ka tnad pulit halor ka jingkloi ban shimkhia ia ki jingjia ba malu mala ha ka nongbah hynrei kim lah pat ban ai ka jingiada kaba shngaiñ ia ki paidbah ha khappud.
“Tang na ka daw jong uwei u briew ba shah thap ha Jaiaw u DGP mardor u leit jngoh sha katei ka thain, balei pat kim leit sha khappud?” buh jingkylli u president ka KSU Bah Lambokstarwell Marngar.
Ia kane utei u heh duh ka KSU u la kren ha ka jingialang rakhe ia ka lyngkhuh sngi iap ba 187 jong u Tirot Sing Syiem. Shuh shuh nalorkata u la kynthoh ruh ia ka sorkar jylla halor ka jingpyn syrtap da ki pulit ha katei jaka rakhe kynmaw burom thik kumba don ka jingiakhih.
“Ka sorkar ka la dei ban phah ia ki sha ki khappud,” u la ong.
Da kaba kyntu ia ka sorkar ba kam dei satia ban pynshit utei u heh KSU u la ong, “Watla ngim don ki tiar ialeh hynrei ngi don ka jabieng bad ngim salia ban aiti ia ka jingim tang ban im ka Jaidbynriew.”
Shuh shuh u ong ba ka don ruh ka jingthmu wat ban pynpulom ia ki kam jong ka seng hynrei kin ym ailad satia bad kin iai neh ha ka nongrim bad ban ym ailad ia kiwei ban pyndonkam bakla ia ki.
