Shillong, Risaw 04 : U Lamphang ka Iingdorbar Bah Metbah Lyngdoh hynne ka sngi ba-ar, ula kyntait ia ka jingdon bynta jong ka Assembly Secretariat ha ka jingtwa jong u Dome ha ka Iingdorbar Thawain ba dang thymmai jong ka Jylla ha Mawdiangdiang.
“Ka Assembly kam don bynta eiei ruh em” ong u Bah Metbah haba jubab ia ka jingkylli ki nongthoh khubor halor ka jingmih u dak jingkylli pyrshah ia ka rai jong ka sorkar ban thung ia ka IIT Guwahati ban leh audit, kaba don ka jingiadei bad ki ar tylli ki kompani ba pyntrei ia kane ka project.
U Bah Metbah uba khlieh ia ka High Power Committee (HPC) ula ong “Ngam don jingtip eiei ruh em halor ka jingdon jingiadei ka IIT Guwahati bad ki artylli ki kompani ba trei contract”.
Haba kylli kumno ia kane ka project la ai pyntrei ha ka kompani kaba la shah kyntait, u Lamphang ula ong “Sngewbha phi kren ia ka Sorkar bad ka Tnad PWD namar kane kam dei ka jingpeit jongka Assembly”.
Ula bynrap “Ka shong ha ka sorkar. Phi kylli n aka Sorkar ia kane ka jingkylli ym ia nga, nga mut ba kumno nga jubab haba ngam tip eiei shaphang kane ka kam kaba phi kylli”.
Ha ka 30 tarik u Nailur, ka All India Trinamool Congress (AITC) kaba don ha ka Liang Pyrshah ka la dawa ban thung ia ka Indian Institute of Technology (IIT) ba kan pynlong ia ka audit ba thymmai halor ka jingkhyllem u dome jong ka Iingdorbar thaw ain ba thymmai ha Mawdiangdiang.
Ka Liang Pyrshah kala ban jur ruh ia ka jingdonkam ban sei madan ia ka jingdon jingiadei hapdeng ka sorkar Meghalaya Democratic Alliance (MDA) bad ki artylli ki kompani ba pyntrei ia ka project ba kynthup ia ka UPRNNL bad ka Badri Rai & Co.
