Shillong, Risaw 04 : U Brigadier (Dr) BD Mishra ula bam smai hynne ka sngi ba-ar kum u Lat ba thymmai ka Jylla Meghalaya.
La pynsmai ia u da u Judge ka Meghalaya High Court u Justice JS Thangkhiew ha ka jingialang kaba la long ha Raj Bhavan.
Kiba la iadonlang ha kane ka jingpynbam smai ia u Lat ki kynthup ia u Lamphanb ka Iingdorbar Bah Metbah Lyndoh, u Myntri ka Tnad rep Bah Banteidor Lyngdoh, u Myntri kam Pohiing ma Lahkmen Rymbui, u MLA Saleng Sangma, u Chief Secretary Bah DP Wahlang bad kiwei kiwei.
U Dr Mishra, uba dei u Lat ka Jylla Arunachal Pradesh, ula shimti ruh ia ka kam kum u Lat ka Jylla Meghalaya hadien ba ka samoi treikam jong u Satya Pal Malik kaba la kut noh hynne ka sngi, ym shym la pynjlan shuh.
Hadien ka jingshimti ia ka Ophis, u Dr Mishra ula pynkynmaw ba ka Shillong ka dei ka Camp Zone area jong ka thma ba jia ha u snem 1971. “Ngi la iashim bynta ha ka thma bad ngi la jop ia ka Pakistan” ula ong.
U Lat ula ai jingiaroh bha ia ki nongshongshnong ka Nongbah Shillong bad ka jingkhuid jong kane ka Nongbah.
“Ka dei ka jaka kaba sngewtynnad, ki briew kiba bha, kaba khuid bad nga nga shohbiej bad nga ai khublei ia phi baroh ki nongshongshnong na Shillong bad ka Jylla Meghalaya” ula ong.
U Dr Mishra un iai bteng ban bat ia ka shuki u Lat ka Jylla tad haduh ka jingpynbeit da kumwei pat, lat kum ka jingpyntip bala pynmih da ka Rastrapati Bhavan.
U Dr BD Mishra ula shongthait na ka Indian Army ha ka 31 tarik Naitung 1995 hadien ka jingshakri ba bun bun ha ka kam shupai. Ula sdang kum u Infantry Officer ha ka 17 tarik Nohprah, 1961. La kha ia u ha ka 20 tarik Naitung, 1939.
