Shillong, Naiwieng 18: U MLA barim ka Mawsynram constituency u Bah HM Shangpliang u kyntait mardor iaka jing kynnoh ba u la pyndonkam bakla iaka pisa kaba kot T.1.25 klur jong ka SRWP scheme.
Haba kren shaki lad pathai khubor, u Bah Shangpliang u la ïathuh ba ki briew kiba kynnoh pyndonkam bakla iaka pisa ki dei ki nongkitkam jong ka United Democratic Party (UDP) Mawsynram circle.
Ula kam ruh ba ha u bnai Naiwieng 2022 hadien ba u la ieh kam noh kum u MLA, kala wan ka hukum (Order) naka Ophis BDO ban nym pyllait shuh iaka Second Instalment jong ka MLA skhim 2022-2023.
U la ïathuh ba ka pisa ba kum u MLA u dei ba ioh ka dei T.2.50 klur hynrei hadien ba u la ieh kam noh kum u MLA, u khlem ioh shuh iaka Second Instalment-ka song pisa ba kot T.1.25 klur.
“Kane ka song pisa ba ki kynnoh ka dei jong ka Second Instalment bad ka dei ka hok jong u paidbah ka Mawsynram bad kane ka jingkynnoh ki nongkitkam ka UDP ka dei ban khanglad iaki paidbah ban ioh iaka pisa” kynthoh kylla u Bah Shangpliang.
U Bah Shangpliang u la kubur ba kam dei ka mon jong u MLA ban leit sei iaka pisa hynrei ka jingleit sei kadei lyngba ka hukum (Order) bala wan naka tnat C&RD.
