Kyntait ki Nongshong dukan madan ban mih na Khyndailad | Ngin kynriah hadien ba pynbeit ia jingleh bakla ka PVC

Shillong Jylliew 30: Ki nongdie dukan madan kila kyntait ban mih na ka thain Khyndailad kum ka dak ban pyrshah jur iaka jingkyndang jong ka Shillong Municipal Board (SMB) hynne ka step Sngi Nyngkong.

Katkum ka Meghalaya and Greater Shillong Progressive Hawkers and Street Vendors Association (MGSPHSVA), ki nongshong dukan bad ki nongdie madan kin kynriah tang lada la pynbeit shwa ia ki jingduna bad ki jingbakla da ka Provisional Town Vending Committee (PTVC).

Kane ka jingkyndang ia ki nongdie madan kadei kaba la leh hakhmat ka jingdon ki majistor bad ki pulit, kadei hadien ba ka sorkar jylla kala pynmih ia ka jingpynbna ha ka 21 tarik u Jylliew ba ka bynta kaba shapoh ne Ground Floor jongka Meghalaya Urban Development Authority (MUDA) kum ka ‘Zending Zone’ ne ka jaka ban shong die jingdie bad ki bynta ba sah jongka thain Khyndailad kan dei ka ‘No Vending Zone’ ne ka jaka kaba ym shah ban shong die jingdie.

Ka Nongialam jongka Thma U Rangli Juki ka Kong Angela Rangad, kaba kyrshan ia ka MGSPHSVA, kala kynthoh tyngeh ia ka SMB kaba pyrshang ban pynthud ia ka shongsuk shongsain da kaba pyrshang ban kyndang jubor ia ki nongshong bad ki nongdie jingdie.

“Ngin ngin ym ailad ia ka SMB ba kan kyndang ia ki nongshong die madan. Ngi ngin kynriah tang hadien ba ngi lah ioh ia ka Plan ne ka jingpynkhreh” kala ong haba iakren bad ki nongthoh khubor.

Ka Kong Angela Rangad kala ong, ba ka MGSPHSVA kala iai dawa naduh u bnai Kyllalyngkot na ka SMB ban pynsangeh ia ki kam ki jam hynrei kala iaid shakhmat ban shna iaka jaka ha khrum jong ka MUDA khlem ka jingioh jingmynjur na ka PTVC. Kala kynnoh ruh ba katei ka jaka kaba la ithuh ha MUDA kam long kaba bit kaba biang ban die shong die jingdie bad kam long ruh kaba shngain na ka bynta ki nongdie jingdie bad ki nongwan thied jingthied.

“Ki (SMB) kidei ban wanrah ia katei ka Plan ne jingpynkhreh hakhmat jongka PTVC. Kane kadei namar ba ngi dei ki dkhot kiba la shah pynkup bor jong ka bad ngi dei ma ngi kiban rai kumno ban iaid shakhmat (halor ka jingthmu ban pynkynriah ia ki nongshong die madan)” kala ong.

“Ngim shim la ong ba ngin ym kynriah hynrei ngin kynriah katkum ki kyndon” ong ka Kong Angela ryngkat bad ka banjur ia ka jingdonkam ban pynbeit ia ki jingduna.

Haba kylli shaphang kitei ki jingduna, ka nongialam ka TUR kala ong, “Naduh kaba sdang, ngi lah ong ban leh ia ka ‘Insitu Survey’ ban tip ia ki nongshong dukan bad ki nongdie madan kiba dei hok, ban pynlong ia ka jingkam bad ka jingpyrshah ban iohi la katei ka survey kan kynthup shisha ia ki nongdie madan kiba dei hok lane kin don ne em kiban shimkabu ia kane bad kane ka kam kala poi shaduh u pud ia ka jingai ia ki lisen. Kum ka dkhot jongka PTVC, ngi lah kdew ba ngi tip thikna ba ki don ki briew kiba don ia ki dukan kiba heh, hynrei kila ioh pat ia ka lisen ban shong die madan”.

“Kumta ngi lah dawa ba donkam ban pynbeit noh ia kitei ki jingbakla bad jingduna hashwa ban iaid shakhmat bad katei ka kam namar phin sa thaw shuh shuh ia ki jingeh lada phi ai ia ki lisen sha ki briew ki bym dei hok ban ioh” kala ong.

Ka Kong Angela Rangad kala kdew ruh “Kawei ka longkmie kaba la shong die jingdie hangne mynta la palat 30 snem hynrei kam shim la ioh ia ka lisen. Kane ka pyni ba ka jingleh ia ka Digital Survey kala pulom”.

“Ka Digital Survey kam shim la don ia ki dur ki dar jong ki nongdie madan, kaba ka kyrteng ka jongki kala mih ha ka thup kyrteng” kala kynnoh.