Nongpoh, Nailar 22 : Ka Dorbar Shnong ka Umroi Madan, kila pynshai ba ka surok 4-lane ba thmu ban shna da ka Sorkar na Umiam-sha Malidor, kam don jingktah eiei ruh em ia ka tyllong umbam umdih jong ka Shnong kumba kam da kiwei pat ki kynhun.
Ka Dorbar Shnong kala pyntip ruh ba kala dep wan jurip ia ki jaka ban pyniaid ia ka surok 4-Lane ha Umroi Madan ha ryngkat ki bor Sorkar bad shem dalade ba ka surok bad ka tyllong umbam umdih jong ka Shnong, ki dei kiba dang iapajih bha kawei ia kawei pat.
Kane ka jingpynshai ka Dorbar Shnong kala mih hadien shisngi ka jingleit ujor jong ka kynhun ba ialam da u Bah CL Marsharing sha u Deputy Commissioner, ba pyrshah ban pyniaid ia ka surok na ki ranab lum jong ka shnong Umroi Madan namar ka jingdon jong ki tyllong um, ia kaba kala kam ba kan sa shah ktah jur ha ka surok.
U Rangbah Shnong ka Umroi Madan Bah Lamborlang Makri bad u General Secretary Bah Banshanskhem Rynjah, kila pynpaw ba ka Shnong Umroi Madan kam don jingpyrshah eiei ruh halor ka jingthmu shna surok 4-lane na Umiam sha Malidor bad ka jingpyniaid lynti ia ka surok napoh u pud u sam jong ka Shnong.
Kine ki Nongialam Shnong kila pynpaw ruh ia ka jingsngewkhia kaba jur halor ka jingmih khubor hynnin ka sngi ba kynnoh pyrshah ia ka Dorbar Shnong ba ka khlem leh eiei halor kane ka kam.
“Ha ka jingshisha, ka Dorbar Shnong haba ioh jingtip ia ka jingwan jong ka surok, kila leit ban ai jing thoh sha u Deputy Commissioner ka Ri-Bhoi ha u bnai Naiwieng 2023, ban pynthikna ba ka surok kam dei ban ktah ia ki tyllong umbam umdih jong ka shnong” kila ong.
Ki pyntip ba “U Deputy Commissioner ula phah da ka jingthoh sha ka National Highways & Infrastructure Development Ltd (NHIDCL) bad ula ai ruh ia ka kopi sha ka shnong ha u bnai Nohprah jong utei u juh hi u snem”.
“Halor kane ngi la pynlong ia ka jingiaid jurip ha ryngkat ki bor Sorkar ban pynthikna la kane ka surok kan ktah ne em ia ki tyllong umbam umdih. Hynrei ngi la shem ba kam don jingktah namar ka surok ka dang jngai na ki jaka ba don ki tyllong um” ula bynrap.
Kine ki Nongialam Shnong kila kynthoh ruh ba ka kynhun jong u Bah CL Marsharing, kala dei ban iakren ne wad jingtip shuwa na ka Dorbar Shnong hashuwa ba kin leit ujor sha u Deputy Commissioner halor kane ka kam.
