Shillong, Lber 10 : U Nongialam ka National People’s Party (NPP) bad Nongaiktien ka Sorkar Meghalaya Democratic Alliance –II Marcuise N Marak hynne ka sngi thohdieng, ula kyntait ia ka jingkynnoh “iathied kulai” da u Dr Mukul Sangma ba pynpulom ia ka jingthaw Sorkar khlem ka NPP bad BJP ha Jylla.
“Kam don satia ka jingiathied kulai” ong u Marcuise haba jubab ia ki nongthoh khubor halor ka jingkylli ba iadei bad ka jingkynnoh u Myntri Rangbah barim Dr Mukul Sangma ba ki seng riewlum, AITC bad Congress kila duh thaw Sorkar namar ka jingiathied kulai jong ka NPP.
“Lada katto katne ngut na ki MLA ba dang shu jop thymmai ki kwah ban iasoh bad ka Sorkar ba ialam ka NPP, ka dei ka kamram jong ngi ban pdiang ia ki. Namar kata, kam don satia ka jingiathied kulai?” ula ong.
Ha ka sngi shong Ophis ba nyngkong eh kum u Myntri, u Marcuise uba bat ia ka Tnad PHE, ula pynpaw ia ka jingsngew skhem ba ka Sorkar MDA kan lah ban treikam bha.
Ula ong ba u shem ba ka jingsam ia ka bhah kam sha baroh ki Myntri Sorkar ka dei kaba la leh khlem ka jingnoh tarajur.
“Kiba bun ki Myntri Sorkar ki dei kiba la shemphang ha ka kam-Bah Paul, Ampareen bad u Mondal ki dei kiba la don slem ha ka kam. Kine ki dei ki Myntri kiba la dep pyni ia ka jingtbit treikam. Namar kata, nga kyrmen ba ka Kynhun Myntri kan lah ban treikam bha bad nga ruh ngan pyrshang katba lah ban treikam bha” ong u Marcuise.
