Shillong, Lber 10: U Myntri ka tnat Animal Husbandry and Veterinary bah A.L Hek hynne ka sngi Thohdieng, ula pynpaw ba kum u Myntri Sorkar u don ia ka thong ban pynthikna ba ka jylla Meghalaya kan pahuh pahai noh haba iadei bad ka jinglah ban pynmih doh.
Haba kren sha ki lad pathai khubor u bah Hek ula ong ba bun ki paidbah nong shong shnong ka jylla ki dei kiba bam doh la ka dei doh Masi, doh sniang, doh syiar ne doh blang hynrei baroh ki tip ba ka jylla kam lah ban pynbiang iaka jingdonkam doh.
U bah Hek ula ong ba hynne ka sngi ula lum ka jingialang jong ki heh ophisar ka tnat ban sngewthuh kumno ka tnat ka treikam bad kumno ban leh naka bynta ban pynthikna ba ka jylla kan lah ban pynmih pahuh ia ka doh ban bam.
“Kala donkam iaka sorkar bad iaka tnat Animal Husbandry and Veterinary ban wad ia ki lad lynti kumno ban leh khnang ba ka jylla Meghalaya kan lah ban pynmih kham bun ka jingdonkam doh” la ong u Hek.
U bah Hek ula ong ba naka liang ka tnat ka donkam ban shim khia haba iadei bad ka jingkynnoh ba jur ka jingkhaii tuh masi namar kane ka lah ban dei ruh kawei na ki daw ba pynduna iaka doh hapoh ka Jylla.
Ula ong ba watla ka jylla ka don iaka Piggery Mission hynrei namar ba u dang thymmai hapoh kane ka tnat um pat lah ban ong eiei kumno ban kyntiew iaka kam ri sniang hynrei shen un sa lum iaki ophisar ban sngewthuh halor ka rukom treikam kane ka Mission.
