Guwahati, Nailur 16 : Ki hynriew kynhun nongshong shnong kiba dei ki jaidbynriew riewlum ka Assam, kata ki Tai Ahoms, Morans, Mottocks, Chutias, Koch-Rajbongshis bad ki Tea Tribes sa shisien pat kila shah kyntait biang ha ka sorkar pdeng ba la lamkhmat da ka BJP ban ioh ia ka bhah kyrpang kum ki Schedule Tribe (ST).
Ka jingdawa ban shah kynthup ha ka bhah ST da kine ki hynriew kynhun jaidbynriew ka Assam ka dei ka mat kaba la slem bha.
Namar ka jingkyntait ban ai ia kane ka bhah ST sha kine ki hynriew ki kynhun jaidbynriew ka Assam, na ka liang ki dkhot jong shong shnong jong kine ki jaidbynriew hynnin ka sngi Palei kila mih sha ki surok ban pynpaw ka jingbitar pyrshah ia ka sorkar pdeng bad ia ka sorkar jylla kumjuh.
Kine ki nongiakhih pyrshah kila pynlong da ki jingiakhih ha ki bynta bapher bapher ka Assam, kata da kaba thang ruh ia ki dur tyngshop jong u Myntri Rangbahduh (PM) ka ri u Narendra Modi bad u Myntri Rangbah (CM) ka Assam, u Himanta Biswa Sarma.
Na ka liang ka sorkar pdeng ba la lamkhmat da ka BJP ha ka sngi Balang ba la lah kala ai ka jingmynjur na ka bynta ka bhah ST sha ki 12 tylli ki kynhun jaidbynriew na ki jylla bapher bapher jong ka ri.
Da kaba phaikhmat sha ka ilekshon assembly ha Himachal Pradesh, na ka liang ka kynhun myntri ka sorkar pdeng hapoh ka jingialam jong u PM Modi ha ka sngi Balang ba la lah kala pynjur halor ka jingpynkylla ia ki kyndon jong ka constitution kaba la ai ka jingithuh kaba kyrpang kum ki trai shnong na ka bynta ki jaidbynriew Hattee ha kane ka jylla.
Nalor kata ka kynhun myntri kala pynbna ruh ia kane ka bhah kyrpang (ST) na ka bynta kawei pat ka jaidbynriew hapoh Tamil Nadu.
“Ka jingiakhih ka jong ngi ka long pyrshah ia ki jingkular ka sorkar BJP ban ia ia ka bhah ST sha kine ki hynriew kynhun ki jaidbynriew ka Assam.Sa shisien pat ngi la duh noh ia kane ka bha hadien ba ngi la ap khmih lynti la slem bha.Kane ka dei ruh ka jingkular jong u PM Nanrendra Modi ha ki jingialap ilekshon ha Assam,” pynpaw ki nongialam jong kitei ki kynhun jaidbynriew.
