Shillong, Jymmang 21 : Ka North Eastern Council (NEC) kala kynshew haduh T.555.63 klur ha Meghalaya ha ki snem ba hap hapohka 15th Finance Commission (2022-26), kaba kyrshan ia ki project jingtei, ka pule puthi, ka sengkam sengjam, ka kamai kajih ki riewlum, ka kam jngohkai bad ka jingshna surok.
Kat kum ka kyrwoh, ka NEC kala pynlut haduh T.160.87 klur hapoh ka Schemes of NEC (SoNEC), da ki project kiba pynleit jingmut ha ki jingtei ha ki shnong ki thaw, ki iingskul, ki iew, ki jingkieng, ki jingdonkam ha ki jaka jngohkai bad ka jingkyrshan haki jaka ai jingsumar.
Nalor kane, ka kyntiew ruh ia ka kam pynmih umngap, ka jingrep tit, ka jingtylliat ia u shynrai lakadong, ka jingpynroi ia ki kam ri jingri, ka jingrep khlem dawai bad kiwei kiwei.
Ka NEC ka ong ba ki project ki thmu ruh ban pynneh pynsah ia ka pateng ka Meghalaya ha ka kolshor lyngba ki jingpyni nam ia ka kolshor, ki community hall bad ki jingtei jong ka eco-tourism, haba pynkhlain ia ka sengkam sengjam ki kynthei, ka jingpynroi ia ki sap treikam, ka jinglum ia ki niut bad jaboh jabain bad ki jingshna bha iaki iew ha ki jaka nongkyndong bad ki jaka ki riewlum.
Hapoh ka NESIDS-Road programme, ka Meghalaya kala ioh ia ka pisa na ka bynta ki san tylli ki project kiba shongdor haduh T.331.51 klur, ha kaba lai tylli ki project ba T.98.32 klur ki dei kiba la dep ban pyntrei. Napdeng kiwei ki project bala dep pyntrei ka dei ka jingpynheh ia ka surok Mawshynrut-Hamin (Athiabari), kaba la khmih lynti ba kan pynsuk ia ka lad pyniasoh ha ka thain bad ka jingiaid ka khaii ka pateng.
Ka NEC kala dew ruh ia ki jingmang pisa ba kongsan hapdeng u snem 2025-26, ba kynthup ia ki project ba shongdor haduh T.33.85 klur na ka bynta ki jingtei ha ki jaka sor, ka jingpynroi ia ka sengkam sengjam bad ka pule puthi. Kawei na ki project kaba heh ka kynthup ia ka jingpyniaid thymmai ia ki pipe um bad ka jingpynitynnad ia ki jaka sor ha shilynter ka surok sha Iewduh, kaba thmu ban pynbha ia ki nala, jinglum niut, jingtbeh bording elektrik bad ki painkhana ha kane ka Iew ba don la ka khana ka pateng.
Kiwei pat ki project ki kynthup ia ka Integrated Entreoreneurship and Livelihood Centre na ka bynta ki samla riewlum, ka jingkyrshan ia ki kynthei ha ka sengkam sengjam bad ki nongrep, ka jingkyrshan ban tei ia ka RK Misson School ha Sohra hapoh ka Focused Development of Deprived Areas programme.
 kala kynshew haduh T.555.63 klur ha Meghalaya ha ki snem ba hap hapohka 15th Finance Commission (2022-26), kaba kyrshan ia ki project jingtei, ka pule puthi, ka sengkam sengjam, ka kamai kajih ki riewlum, ka kam jngohkai bad ka jingshna surok.){kind=link}