Agartala, K’lyngkot 18 :Ki party liang pyrshah ha Tripura ki la pynpaw ia ka jingbitar kaba jur pyrshah ia u Myntri ki kam Ain ka jylla, u Ratan Lal Nath uba la pynmih ia ki jingkren ki bym iahap haba kynthoh pyrshah ia ki liang pyrshah. U Nath ula ong; “Kynruh ia ka shyntur da ka umjung masi hashwa ban kren halor ka synshar paidbah ne democracy.”
“Hashwa ban kren shaphang ka synshar paidbah, ki party liang pyrshah ki donkam ban kynruh ia ki shyntur jong ki da ka umjung masi.Kata nalor ka jingpynmih ia ki kam iaumsnam bad ki jingkhihwin ha ka por ka jingsynshar ka jong ki ha Tripura,” ong utei u myntri ba khmih ia ka tnat Ain.
Ia kane une u Myntri u thew pyrshah ia u Dr. Ajay Kumar, general secretary jong ka party Congress kaba dang shen kala khot ia baroh ki party kiba pyrshah BJP ba kin iatylli lang kawei na ka bynta ban pynkhieim biang ia ka synshar paidbah bad ban pynneh ia ki riti synshar khadar.
Kham hashwa, kata ha ka 14 tarik mynta u bnai u Dr Ajay Kumar u la pynlong ka jingleit jurip ia ka headquarter jong ka CPI(M) ka jylla hapoh Melarmath, Agartala bad sdang ban pynlong ka jingiamir jingmut na ka bynta ban ieng iatylli ha ka jingiakhun pyrshah ka BJP hashwa ka jingpynlong ia ka ilekshon assembly ha ka jylla.
U Dr Ajay Kumar u la ong ba baroh ki party kiba ieng pyrshah BJP ki dei ban wan lang ha kajuh ka rynsan namar ka BJP ka la pyndonkam da ki kynhun runar hapoh Tripura. “Ngi ieng pyrshah ia ka BJP.Ngin kyrpad ia baroh ban iasnohkti lang bad ngi. Hynrei, kito ki bym wan bad ngi kin hap ban jubab la ka don ne em ka jingpyrshan ban aibor bad pynkhlain ia ka BJP.Ka dei ka jingialeh kaba khraw na ka bynta ki paidbah nongshong shnong ka jylla.Ai ba ki paidbah kin shim ia ka rai la ki kwah ne em ia ki kam ki jam bad ka shongsuk shongsain..Donkam ban iada ia ka Tripura bad ia ki briew jong ka na ki kynhun runasr,” ong u Kumar.
Haba kylli la ka don ne em ka lad ba kine ki paralok kin pyrshang ban banbor iwei ia iwei pat khamtam namar ka CPI(M) ka don kham bun ki nongmihkhmat ha kiba bun tylli ki ilekshon kiba la dep, u Ar Ajay u la ong; “Kam don satia kano kano ka jingkylli kaba iadei bad ka jingbanbor hapdeng shipara.Ngin iatrei ryngkat lang. Mano ban banbor hapdeng ka IPFT bad ka BJP! Kine kim don kano kano ka jingiadei.”
