Guwahati, Nailar 13: Sawngut ki khynnah ki ba dang hapoh rta ki la shah kynnoh donkti ha ka ba leh beijot ia kawei ka briew ka ba la iathoh shongkurim ha Morigaon district ka Assam.
Katkum ki khubor la ong ba ia uwei na kine ki khynnah la kem noh da ki pulit bad la set ia u ha ka jaka jong ki khynnah hapoh Jorhat.Laingut kiwei pat ki dang don hapdeng ka jingphet rieh bad na ka liang ki bor pulit ki dang pynlong ka jingthwet.
La kynnoh ba kine ki sawngut ki khynnah ki la leh beijot ia kane ka briew hajan kawei ka jaka thang briew ha ka thain.
Katba kane ka briew kam shym la ujor FIR ha ka ba nyngkong, hynrei na ka liang u kurim jong ka u la pynbor ia ka ba kan ujor hapoh Morigaon Police Station.
Utei u khynnah u ba la shah kem u dei u ba dang don ha ka rta 16 snem.Ia une u khynnah la pynngat ha ki kyndon sections 365 bad 376D jong ka Indian Penal Code (IPC).
Ha ka ba kum kane ka juh ka jingjia, ki pulit ka Assam ki la kem noh ia arngut ki khynnah samla halor ka jingkynnoh donkti ha ka ba leh beijot ia kawei ka khynnah ha Hailakandi district ka Assam ka ba la jia ha u bnai Naitung ba la dep. Ia kine ki ba la shah kem la tip kyrteng kum u Abdul Hussain bad u Salim Uddin.
Katkum ki khubor la iathuh ba kane ka jingjia ka la jia hapoh ka shnong Kanchiala ka ba hap hapoh Ramnathpur police station ha ka 15 tarik u bnai Naitung ba la dep.Kine ki samla la ong ba ki la leh ia kane ka kam bymman pyrshah ia katei ka khynnah ka ba dang hapoh rta hapoh kawei ka jaka khlaw ka ba don ha ka shnong Kanchiala, ong ka lad pathai khubor ka ba la shim ia ka jingkren jong u Superintendent of Police (SP) ka Hailakandi district, u Gaurav Upadhyay.
