Shillong, Risaw 31 : Arphewei ngut ki briew kynthup ki khunlung khynnah lah ioh ban pyllait im na ka tyrsim jong u paidbhur ba don kumba 200 ngut eiei, kiba la leit thombor bad thmu ban wiang ding ia kawei ka Iing ha Khliehshnong Sohra ha ka miet sngi Palei, namar ka jingsuba ba ka dei ka iing menshohnoh.
Kane ka Iing ka dei jong u Bah Ham Shangpliang, ong ki Pulit kiba iathuh ba haduh phra ngut ki Pulit kila mynsaw na ka jingpyni bor jong u paidbhur.
Kane ka jingjia kala mih tang namar ka jingkynnoh menshohnoh da uwei u khynnah rit uba kam ba ula ngat ha ka jingleh sniew u Bah Shangpliang.
Khyndai ngut ki briew la ithuh kum ki nongpynshit ia u paidbah bad ia kine ki briew la kem da ki Pulit ia mynta. Ki Pulit ki pyntip ba kin dang don shuh shuh ki briew ki ban sa kem katba nang iaid ka jing tohkit.
Kat kum ka jingiathuh u Superintendent of Police ka East Khasi Hills Bah Vivek Syiem, ki paidbhur kila leit tawiar sawdong bad pynjulor iakane ka Iing.
U iathuh ba u BDO ka Shella bad u SDPO ka Sohra kila leit mar mar sha kane ka jaka hynrei ki paidbhur kila lum maw pynban sha ki Pulit bad SOT bad knieh ruh ia ki tiar ba tehlakam ia u paidbhur ia kaba la ioh kurup noh hadien.
Ki Pulit ki iathuh ba ha ka jingtohkit la lap ba kane ka jingjia kala mih tang namar ka jingkam jong une u Khynnah rit uba kynnoh ba u iohi ia ka syrngiew u Bah Ham Shangplieng bad ngeit halade ba ula ngat ha ka jingshah lehsniew ha une u rangbah, ong ki Pulit.
Ki bor ka ain kila hap ban pyndonkam ia ki tyndong lyer pynsat khmat bad ki stunt grenade ban pynsaphriang ia u paidbah khnang ban ioh lynti ban pyllait ia ki briew ba don ha kane ka Iing.
Ka jingiatreilang hapdeng ki Pulit bad ki Magistrate, kala lah ban pyllait im ia ki 21 ngut ki briew kynthup ki khunlung khynnah, ia kiba la wankit noh sha Shillong Civil Hospital ban phah khmih bniah ha ki doktor.
Ia kane ka jingjia la register case ha Sohra Police Station bad ka jingtohkit mynta kala iaid shakhmat.
