Shillong, Nailar 18 : U Symbud Myntri Rangbah ka Jylla Bah Prestone Tynsong hynne ka sngi palei, ula ong ba ka jingkynnoh jong ka Liang Pyrshah All India Trinamool Congress (AITC) haba iadei bad ka Smart City Project ka dei kaba kamkai bad tang ka buit politic.
Kane kala mih shisngi hadien ba ka AITC kala kam ba kala lap ia ka jingbym pyntreikam hok ia ka Shillong Smart City Project.
Haba iakren bad ki nongthoh khubor, u Bah Prestone ula ong ba ka jingkynthoh jong ka AITC ba ka Shillong Smart City Limited (SSCL) kala ioh ia palat T. 1005 klur ka pisa ban pyntrei ia ki project bapher bapher na ka sorkar pdeng bad sorkar Jylla ka dei ka bym shisha satia.
“Kala kynnoh ba ladep ban pyllait ia ka song pisa ba T. 1005 klur ka dei kaba bakla pura namar haduh mynta, ka pisa ba ngi la ioh pdiang lyngba ka SSCL ka dang long tang T. 251 klur ha kaba T. 55 klur ka dei ka bhah jong ka Jylla bad tang T. 196 klur ka dei ka bhah ba wan naka sorkar Pdeng” ula ong.
Haba iadei bad ka jingai jingkhein ia ka Financial Statement jong ka SSCL bad ka Registrar of Companies (ROC) kat kum ka Article jong ka Association, u Bah Prestone ula pynshai ba kat kum ki kyndon, ia ka Financial Statement la dei ban ai jing khein bad ka ROC, Cooperation Society hadien bala dep ia ka Audit da ka CAG bad kaba la pdiang da ka jingialang jong ka Board.
“Ngan iathuh ia phi ba ka Audit ka dang iaid mynta ia ka Book of Account bad la pynthikna ruh da ka CAG. Ka CAG kala pynthikna bad ka sienjam ba bud ka long ba ngi hap ai jingkhein ia kaba ngin sa leh hapoh u bnai ban wan” ula ong.
“Kane ka long ruh namar ka Rule ka ong ba shuwa ban ai jingkhein ia ka Financial Statement, ka Board kan hap ban mynjur ia ka kaiphod jong ka CAG bad ka kaiphod jong ka Statutory Auditor” ula bynrap.
U Symbud Myntri Rangbah ula pyntip ruh ba ka Auditor ka dang leh audit mynta ia ka jingkhein jingdiah jong u snem mang tyngka 2020 bad 2021 bala mynjur ruh da ka CAG.
“Namar kata, ka jingkynnoh jong ka AITC ka long kaba don eiei ha lyndet..kadei kaba shu thok bad ka dei beit tang ka buit politics” ong u Symbud Myntri Rangbah.
