Shillong, Nailar 18 : Ka sorkar jylla ha ka sngi Palei ka la pynbna ba ka la weng noh ia ka jingkhang pyndonkam ia ki sboh dawai urea ban thung jingthung bad ha kajuh ka por ruh ban kyrshan haduh 50 persen kum ka subsidy sha ki nongrep kiba ju thied bad pyndonkam ia kitei ki dawai sboh.
Ia kane u Symbud Myntri Rangbah u la pyntip hadien ka jingialang bad ka synjuk ki nongrep hapoh ka lama jong ka Farmer’s Cell East Khasi Hills. Kumban shu kdew hangne, ka jingkhang pyndonkam ia kitei ki sboh dawai kaba la sdang naduh u snem 2014 ka la pynlong ia ki nongrep ba kin ud kin nam na ka por sha ka por ia ka sorkar namar ka la ktah jur ia ka jingpynmih ia ki mar rep jong ki.
Na ka liang u Bah Prestone u la iathuh ruh ba dei ha ka 09 tarik mynta u bnai, ka tnad ka Rep ka Riang ka sorkar jylla ka la pynmih ia ka jingpynbna ba la shah ban suplai biang ia kitei ki dawai sboh.
Katkum ka jingong jong u, ka dawai sboh kadei kaba peit ban tehlakam da ka Ministry of Fertilizer jong ka sorkar pdeng. “Kumta shen manga ryngkat bad u Myntri Rangbah ngin sa ia kren bad ka tnad ba dei peit ha Delhi ha ka taiew ban wan na ka bynta ban mang bhah kyrpang la ka jong na ka bynta ka Meghalaya,” u la ong.
Shuh shuh u la iathuh ruh ba ia kitei ki dawai sboh yn sa pynpoi lyngba ka Meghalaya State Cooperative Marketing and Consumers’ Federation Limited (MeCOFED), kaba hap ha ka Cooperation Department.
Shwa kane, u Bah Prestone u la iathuh ba ki la ioh pdiang bun ki jingkyrpad na ki nongrep bad kumta hadien ba ki peit bniah ki shem ba ka jingpynmih ia ki mar rep naduh u snem 2014 ba sdang ka jingkhang ia kitei ki dawai sboh ban pynshlur iaka rep khlem dawai, ka la ktah pynban ia ka rep ka riang ha ka jylla khamtam eh ha ka jingpynmih ia ki mar rep.
