Shillong, Risaw 28: Ka kynhun sengbhalang na Chokpot, South Garo Hills, ha ka sngi Ba-ar ki la pynrem jur ia ka jingkam ki bor district ka South Garo Hills ha kaba iadei bad u Uranium bad ka jingtih marpoh khyndew beain ha Chokpot.
Kine ki Sengbhalang ki kynthup ia ka Garo Students’ Union (GSU), A•chik Holistic Awakening Movement (AHAM), Garo Land State Movement Committee (GSMC), A•chik Youth Welfare Organisation (AYWO), Chokpot Area Vigilance Committee (CAVC) bad ka Federation of Khasi Jaintia and Garo People (FKJGP).
Kine ki Seng kila pynrem ruh iaka jingkam ki bor district ba ki sengbhalang ne ki paidbah naka thain kim shym la wan shakhmat ban ujor ha ka por ba leit jngoh ia ki jaka ba la suba ba don ka jingtih uranium bad dewiong beain haka thain bad kila ong ba kane ka jingkam ki bor district ka long kaba ialam bakla.
Ki sengbhalang ki la pynpaw ba haka jingleit jurip iaki jaka, ki la pynpaw ïa ki jingsngewkhia halor ki kam tih beain iaki marpoh khyndew ba lah ban wanrah iaka jingma ia ki nong shong shnong.
“Naka liang ki sengbhalang bad ki paidbah kiba leit jurip lang iaki jaka, ngi la pynpaw ïa ka jingsngewkhia kaba jur halor ki kam tih beain iaki marpoh khyndew ba buh jingma iaki nong shong shnong” ki la pynpaw.
Ki sengbhalang kila la kdew ruh ba ym shym la don ki stad saian ne ki riew shemphang ha ka por ba pynlong ia ka jing jurip ia ka jaka ban ithuh ne bishar bniah ia ki jait marpoh ba don ha katei ka jaka.
Ki sengbhalang kila aiti ia ka jingthoh sha u Deputy Commissioner South Garo Hills, ha kaba la dawa ban pynsangeh noh mardor ia baroh ki kam tih beain iaki marpoh khyndew bad ban pynlong ka jingtohkit daki stad saian kaba khuid bad kaba laitluid halor kane.
Ki la pynrem ruh ia ka jingleh jong ka Sorkar Jylla ban iaid lait ia ka Garo Hills Autonomous District Council (GHADC), da kaba kdew ba kane ka jingleh ka Sorkar ban pyrshang tih marpoh khyndew khlem ka jingmynjur jong ka District Council ka dei ka jingpynkhein ia ka hok riti synshar jong ki trai ri trai muluk.
Ki sengbhalang ki kyntu ia ka Sorkar ba kan shimkhia mardor bad ban pynsangeh lut ia baroh ki kam tih beain iaki marpoh khyndew bad dawa ruh ban pynshai halor ka kyrwoh thok ba pynmih da ki bor district South Garo Hills.
Ki la maham ba lada kum kine ki kam ki dang ïai bteng, ki sengbhalang bad ki paidbah kin shim da kiwei ki lad ki lynti kiba khlaiñ ban ïada ïa ka khyndew ka shyiap, ka um, bad ka mariang jong ki.
