Nongpoh, Nailar 18: Kawei ka Longiing ba na Mawpun Kshaid, Umroi, kala kynnoh ia ka Bhoirymbong Community Health Centre (CHC) ba ka sumar torti ia kawei ka Longkmie ba armet haduh ba poi sha ka jingkhlad noh I Khunlung ha kpoh ka Kmie.
Kane ka Longiing ka dei jong I Kong Liza Marry Marbaniang iba la kha ia I Khunlung bala khlad lypa ha Kpoh, kaba la jia ha ka 16 tarik u Nailar.
La kynnoh ba kane ka jingjia kala wan jia ruh hadien ka jingsumar ba armiet arsngi duna hapoh ka Bhoirymbong CHC shuwa ba kane ka Hospital Sorkar kan phah ialam noh ia ine I Longkmie ban leit wad jingsumar sha ki Hospital ka Nongbah Shillong.
Kat kum ka jingiathuh I Kong Mitilda Marbaniang, Kmiedeng jong I Kong Liza Mary bad I hynmen I Kong Liza kong Rubinica Marbaniang, I Kong Liza ila sdang ban suh kha ia I khun ha ka miet jong ka 14 tarik Nailar bad ha kane hi ka miet por 11:30 la rah noh ia ki sha Bhoirymbong CHC ban ioh ia ka jingsumar.
Ki kynnoh ba ynda poi ha Hospital, ki Doktor kila peitbniah ia I Kong Liza bad pyntip ba I don ka jingkiew BP ha kaba la ai haduh lai tylli ki dawai BP khlem da peit ne ong eiei la I Kong Liza i la dei ban kha ne em ia I Khunlung.
Ki la kynnoh ba hadien arsngi ka jingsumar, kata ha ka 16 tarik Nailar, ki bor pyniaid ka Hospital ki la phah ialam noh ia ine I Longkmie ba armet sha ki Hospital ha Shillong ban ioh ia ka jingsumar ba paka.
“Ngi la ialam noh ia I Kong Liza sha Iing ban lum ia ki tum ki tam kiba donkam ban wan sha Shillong hynrei syndet syndet, I kong Liza ila suhkha bad kha syndon ia I Khunlung iba la khlad lypa hapoh Kpoh” ong I Kong Mitilda bad Rubinica.
Haba pyrshang ban kylli na ki bor pyniaid ka Bhoirymbong CHC, u Dr T Sutnga ula kyntait ia katei ka jingkynnoh haba pyn shai ruh ba katei ka longkmie ha ka por ba wanrah sha Hospital, la lap ba ka don ka jingkiew BP bad kumta ki doktor kila ai dawa ban pynhiar ia ka BP.
Une u Doktor u pyntip ba hadien ba ki Doktor kila khmih bniah ia I Kong Liza la lap ruh ba ka lynti kha kam pat lait bha.
U Dr Sutnga u iathuh ba ki Doktor kila khmih biang ia ine I Longkmie ha ka 15 tarik hynrei la lap ba ka BP ka dang kiew bad la hap ban ai dawai biang. Hynrei haba shem ba ka BP kam hiar satia, ka Hospital kala phah ban ialam noh ia ine I Longkmie sha ki Hospital ka Shillong ban ioh ia ka jingsumar ba paka.
“Ngi hangne ngim pat biang satia ia ki tiar ki tar ban puid ia I Khunlung, kumta ngi la phah noh sha Shillong” ula ong haba pynshai ba ka jingkynnoh ba ka jingkhlad I Khunlung na ka daw jong ka jingai dawai BP ka dei ka bym shisha satia.
