Shillong, Nailar 18 : Ka sorkar jylla ka la thmu ban ailad biang ia ki paidbah nongrep ka jylla ba kin ioh pyndonkam biang ia ka dawai sboh Urea ha ki lyngkha rep jong ki naduh mynta u snem.
Ia kane la iathuh da u Chief Adviser ka Farmer’s Cell ka East Khasi Hills, Bah Kansing Lyngshiang haba kren bad ki lad pathai khubor hadien ka jingkynduh bad u Symbud Myntri Rangbah ka Jylla, Bah Prestone Tynsong ha kane ka sngi Palei.
“Kadei ka khubor kaba kmen namarba ha ka jingkynduh bad ki nongrep ka East Khasi Hills, u Symbud Myntri Rangbah u la pyntip ba naduh ka taiew ban wan un sa pynmih noh ia ka jingpynbna ba yn bteng biang ia ka jingai subsidy na ka bynta ka dawai sboh Urea kaba la khang ban pyndonkam la bun snem mynta,” u la ong haba kren bad ki lad pathai khubor.
Shuh shuh u la iathuh ruh ba haduh mynta ki nongrep ki hap ban kyrthat ban ioh thied ia katei ka dawai kaba shongdor haduh 1200 shi song. U ong ruh ba ki paidbah da ka jingbym banse ki hap ban thied ia katei ka dawai watla ka rem katno katno ruh nalor ba ki shem jingeh ban ioh na iew ruh.
Hynrei u ong pat ba da katei ka sienjam ba ka sorkar ka shim kumba la iathuh da u Bah Prestone Tynsong, ki paidbah nongrep mynta kin ioh pahuh biang ia katei ka dawai kata ruh ha ka dor kaba duna.
“Lada baroh shi katta ki paidbah ki thied 1200 shi song hynrei hadien ba ka sorkar ka la ai biang ia ka subsidy ka dor ba ki hap siew, mar shiteng la siew ka sorkar,” u la bynrap biang.
