Shillong, Jylliew 23 : Ka Chairperson ka Meghalaya State Commission for Women (MSCW) Kong Phidalia Toi hynne ka sngi Thohdieng, kala rai ban iehnoh ia ka kam ba ka bat haba niew ruh ia ka jingleh u Myntri ka Tnad Social Welfare Bah Paul Lyngdoh kum ka jingpyndonkam bakla ia ka bor.
“Ngai ioh jingtip ba nga la shah weng kam na ki lad pathai khubor bad hadien artylli ki jingmih khubor, nga la ioh ia ka show cause notice na ka Sorkar. Hadien ka jingpynshai na ka Board, u (Paul) dang iai pynksan ban ai jingkren kotkhubor ka bym dei shisha”ong ka kong Phidalia haba iakren bad ki nongthoh khubor.
Ka Kong Phidalia kala pyntip ba kala dep aiti ia ka jubab halor ka show cause notice bad pynbna ruh ia ka rai ban iehnoh ia ka kam Chairperson ka MSCW haba ong “Mynta ka sngi nga la phah ia ka jubab halor ka show cause notice bad hadien katto katne ngan sa phah noh ia ka shithi iehnohkam”.
Haba khein ia ka jingle u Myntri kum ka jingpyndonkam bakla ia ka bor, kane ka Chairperson ka MSCW kala ong “Haba peit ia kaei kaba u Myntri ula leh, nga tharai kane ka dei ka jingpyndonkambakla ia ka bor bad nga shim ba ka dei ka jingniew poh, jingibein ia ki kynthei bad jingpynjah burom bad ngan sa khmih ia kaei kaba ngan sa leh hadien”.
U Myntri ka Tnad Social Welfare dang shen ula ong ba ka hukum ban weng noh ai ka Kong Phidalia kum ka Chairperson ka dei kaba leh ym tang na ki jingiohsngew bad u jied ban iaid ha ka lynti kaba dei ban ia ka jingpawnam halor kane ka kam.
Ula kren ia kane haba kynthoh ia ka jingpynmih khubor ka MSCW kaba la khein ia kane ka jingweng ia ka Chairperson kum ka jingleh ba thamula bad ba u Myntri ula ioh ia ki jingtip ki bym dei ba ka Chairperson kala peo haduh 3 tylli ki jingialang na ki 4 tylli jong ka Commission.
Pule lang ia kane: Bthah u DyCM ia ki DC ban buh jingkhein ia ka jingwan ki phetwir na Manipur
