Nongstoin, Iaiong 26 : Ka seng Hynniewtrep Youth Council (HYC)-Shiliang Wahblei Area, kala kynnoh ba u contractor jong ka Tnad PWD (Roads), ula trei torti ia ka surok na Thaiem sha Mawsyrpat.
Kane ka jingkynnoh ka mih hadien ba ka seng HYC-Shiliang Wahblei Area hapoh ka jingialam u President samla Krewel Sangriang, kala wan jurip ia kane ka surok hynne ka sngi Thohdieng.
Kat kum ka jingpyntip une u Nongialam, ka jingshna ia ka surok ka long ka bym biang ha kiba bun ki bynta ba kynthup ia ka jingbym biang ki muri um, ka jingsiang stang bha ia ka rong, ka jingsiang rong tang dep rukom ha kaba bun ki jaka kala pait bad pra nalor ka jingsuki ban pyntrei ia ka kam.
Ka HYC-Shiliang Wahblei Area kala leit ban iakynduh ia u Executive Engineer ban pyntip ia kane ka jingshem ha kaba ula kular ba un sa hiar jurip lang bad ka seng ban pynshisha ia kane ka jingtrei torti.
Ki iathuh ba kat kum ka jingpyntip u Executive Engineer, ka work order ka dei kaba la kdew shai ban pyndep ia kane ka surok hapoh ka 18 bnai hynrei la ong ba na ka jingjurip la shem ba watla ka kam kala iaid la jan 18 bnai pynban ka jingtrei ka dang dep tang hapdeng 60-65%.
