Nongstoiñ, K’lyngkot 20: Ka seng Hynñiewtrep Achik People Council (HAPC) kala kynnoh ba ki Pulit ka Jylla kila suhbuit lang ha ka jingpyniaid ia ki trok kit dewiong beain hapoh ka District bad ka Jylla baroh kawei.
Kane ka jingkynnoh kala mih na u President samla Jylliew Marwein, hadien ka jingjurip ia ki truck kit dewiong ba iaid lyngba ka surok ka thain Riangdo, West Khasi Hills hynnin ka janmiet.
Ha kane ka jingjurip, kane ka Seng kala lap ba ki don ki kali kiba don ia ki challan hynrei ki don ruh ki kali ba iaid khlem ka challan bad ka jubab ba ki ai ka long baka challan jong ki, ka don bad ki dalal.
Ha ka jingjurip ia ki challan, ka HAPC ka la lap ba ka Sorkar kala ai jingbit ban kit ia u dewiong tang 12 ton hynrei ha haba peit pat ia ki trok kit dewiong wat ki trok 6 shaka la suba jur ba kila kit ym duna ia ka 29 ton.
Kane ka Seng ka suba jur ba kane ka jingiohlad ki trok ban kit dewiong katba mon bad ban iaid khlem challan ka dei namar ka jingsuhbuit lang jong ki Pulit. “Kumno ki Pulit kim kem bad kim bat ia kine ki trok ba kit palat pud bad khlem challan lada kim suhbuit lang” buh jingkylli u Bah Jylliew Marwein.
Halor kane, kane ka Seng kala byrngem ba kan leit mudui noh sha Iingkashari ban nym ailad ia ka jingkhaii tuh hapoh ka Jylla.
